Micurà de Rü se desceida 

Cheder a pert sun l tratament dl consonant [v] tl LS La mantegniment dl consonant [v] tamben tla posizion iniziala che daite tla parola ne ti scusa nia a n zacotanc ciuldì che les formes con [v] ti sona massa talianes. L problem fova bele vegnù debatù tla Wegleitung y al é spo vegnù dezidù de mantegnì les formes con l consonant tant inant che ales vegn dant te un o l auter idiom. La rejon prinzipala de chesta soluzion é dantaldut la trasparenza o entenibelté dla parola. Les formes plenes sciche per ejempl volei, vedei, vegnì, vos etc. é plu saurides da capì che les formes scurtedes ulei, odei, gnì/unì, os. Tl caje di verbs en chestion àn ence tegnù cont dla regolarité dl paradigma flescional : les formes plenes vegn dant te duc i idioms tles formes azentedes sun la raisc dla parola : cfr. bad. i vëgne, al vëgn, nos gnun, gnì. La regolarité dl sistem deida emparé plu saurì l lingaz. Tles paroles y posizions olà che l vocal é en general tomé, dantaldut tla posizion intervocalica, él endere vegnù tout su la forma scurteda ; cfr. joen, joé, coé, coa, etc. La rejon per mantegnì l vocal [v] ne é perauter nia demé pratica (la normazion linguistica é na operazion "utilitaristica" y nia na chestion de teoria linguistica) ma ala à ence na fondamenta storica. La tomeda dl consonant é tl ladin n fat rezent y nia generalisé, nience ti idioms y tles posizions olà che al toma en general. Ti tesć vedli dla Val Badia giàten per ejempl ence vorei y vorù (Micurà de Rü) y vos, vost empede os, ost. Ma desche te vigni operazion pratica, ence tl LS àn messù fé compromisc y perchel pòl vegnì dant chilò y ilò valch incoerenza (che pò samben vegnì comededa). Na ultima cossa da tò en conscidrazion é chel dla « originalité » o « tipizité »; chest aspet é lié a la critica de « massa talian » che ti vegn fata al LS. Chilò enciampen gonot te na contradizion : da una na pert vegn ratedes «originales» les formes plu vedles (che en general é plu vejines al la raisc etimologica latina), da l’autra pert vegn ratedes "tipiches"cheles formes che é plu dalonc dal talian (cfr. l bad. lüna vs luna , olp vs volp te autri idioms). Sce an cernessa sistematicamenter les formes "tipiches", che é en general cheles plu inovatives, fajéssen l contrar de cie che l LS vuel arjonje : despartì enveze che unì i idioms te n lingaz tet. L LS é ence de chest vers n compromis motivé: al ciala de mantegnì dut cie che é tipich ladin (no demé de un n idiom), ma al vuel ence garantì sia funzionalité.

La chestion dla (orto)grafia ne é nia na bisinela academica ma na desfida reala y concreta ajache ala « desturba » doseines y doseines de persones che scriv o se cruzia de ladin per rejons de mestier: ensegnanc, aministradours, jornalisć y - audide, audide! - finamai l diretour dl istitut "Micurà de Rü".

Fin ades fova l istitut da San Martin resté valgamia chiet, sciche la problematica dla standardisazion ne ti enteresassa nia o al ne essa nia da dì. Sen, te n articul-intervista sun les « Dolomiten » ai 7 de jugn, podonse ence audì la minonga dl diretour Leander Moroder; ence sce al ne vegn nia dit esplizitamenter podonse raté che al se trata dla posizion ofiziala dl istitut sun chest tema. Ma vedon coche an la pensa a San Martin.

L. Moroder sotrisseia dantfora che al é en prinzip per n lingaz scrit unitar ma al rata che la forma atuala dl ladin dolomitan o standard ne vae nia ben, y chest per plu de una na rejon. La pruma critica che al ti fej al LS é che al ne se destaca nia assé dal talian y chest é, sciche al mina, per trueps gherdeines y badioc n problem. Te chesta critica végnel a lum conscidrazions plu ideologiches che (sozio)linguistiches: da una na pert se desméntien che l ladin é n lingaz neolatin che é perchel tipologicamenter vejin al talian, da l’autra pert ne àn deguna tema dal todesc sceben che ence chest lingaz ae na gran influenza sun l ladin, dantaldut te Gherdeina. Ma l pregiudize antitalian é, en realté, n problem plu gherdeina che badiot, sciche desmostra anter l auter ence l "Survey ladin": i badioc azeteia valgamia saurì l ladin unifiché y ne veid nia chel gran pericul per l "lingaz dla oma".

Les variantes zenza -v- se fova propi vegnudes damanedes da L. Moroder a inom dl istitut MdR: incoerenzes svaientes

N ejempl de chesta "tacia" taliana dl LS é, aldò de L. Moroder, i verbs volei, vedei y vegnì y l sufis -abel. Per chisc verbs propònel de tò su les formes o badiotes o gherdeines zenza v-; proposta de marevueia, ajache l Dizionar dl LS lascia valei, sciche variantes, les formes badiotes ulei, odei y gnì y, desche al fova vegnù ghiré propi da el a inom dl istitut MdR y dl istitut IPL! Tla Gramatica dl LS endere végnel consié, aldò de n critere general dl LS, de adoré les formes plenes volei, vedei y vegnì pervia che chestes vegn capides plu saurì da duc i ladins (ales vegn dant te n valgugn idioms y ales é plu regolares a livel dl paradigma flescional). D’autra pert jissa la forma gherdeina unì en colijion con l verb unì « unire », cie che fossa en contrast con un di prinzips fondamentai dla standardisazion: la trasparenza.

Sun l sufis - abel - Moroder ne fej perauter deguna proposta alternativa - él da dì che al se trata de na formanta derivazionala tipica dla terminologia internazionala y che é vegnuda touta su ence, y a rejon, ti vocabolars di idioms publichés a San Martin. Na incoerenza scraienta donca, ma al ne é nia la soula tla touta de posizion dl diretour de MdR.

Ma é l LS veramenter tant "talian" sciche al miena L. Moroder? Al é vegnù sotrissé n grum de outes, dant da puech ence ciamò da R. Bernardi, che la grafia-fonetica dl LS é scialdi damprò dal gherdeina y che la morfologia (cfr. i pronoms) y la sintassa (cfr l verb en seconda posizion, la negazion dopla, etc.) sourantol en gran pert l model badiot y gherdeina, n model che ne é dessegur nia talian (unfat sce an conscidra la sintassa dl verb en seconda posizion sciche na forma vedla latina/ladina o na inovazion emporteda dal todesch). Ma al é veira: degugn ne é tant verc che chi che ne vuel nia vedei!

N’autra critica de Moroder é che l LS atual respeteia la maioranza di idioms ma nia chela di ladinofons (chi che rejona ladin). Da n pont de veduda formal àl, poester, rejon, ma pòn apliché mecanicamenter l’aritmetica o l proporz a les mendranzes (i derc di todesc de Sudtirol ne é nia garantis dai cinch o sies parlamentars dla SVP a Roma ma ben dal statut de autonomia, che ne é nia basé sun n rejonament aritmetich a livel nazional!?) L manifest "Ladinia 2005" o "11 teses per na politica linguistica interladina", che é vegnù sotescrit da plu de 400 persones, se damana che a duc i idioms ti végnel reconesciù la medema y valiva dignité. La ghiranza che l LS someie de plu al badiot (Moroder adora l’esprescion "Gadertalisch", cie che ne esisteia nia linguisticamenter) ciuldì che al fej fora plu de n terz di ladins, lascia dl dut sun na pert i enteresc di ladins de Souramont; na ghiranza n puech stramba sce an conscidra che l lingaz scrit unifiché o standard dess unì y no despartì i ladins. Na tel veduda strabica fossa ciamò da capì da pert dl assessour F. Mussner che istituzionalmenter se cruzia demé di gherdeines y badioc, ma ala descorda dassen tla bocia de n diretour de n istitut che porta l inom de Micura de Rü.

Tl articul sun les "Dolomites" ne màncel nia i scioliti clichés che vegn trac ca plu o manco mecanicamenter dai nemisc dl LS. Per ejempl che l LS é n lingaz "artifizial". Ma ciuna "Schriftsprache" ne é pa nia n produt artifizial? La discuscion sun la delibera marora à mostré su che l "ladin de mesaval" é n compromis anter i sotidioms dla Val Badia, ma degun ne se scandaliseia per chest, no l diretour Moroder no l assessour Mussner, al contrar, al é vegnù scrit dant tles scoles y tla aministrazion de Bulsan.

Nia dinrer vegn i fac destorc ad hoc per desmostré che la jent ne vuel nia l LS. L Dizionar dl LS vegn, per ejempl, definì n "Ladenhüter" (perauter, chest dizionar ne é nia vegnù dé fora demé dal istitut de San Martin, sciche al vegn dit, ma deberieda con l Istitut ladin de Fascia, l IPL y la Union Generela di Ladins), depierpul che i dizionars di idioms é vegnus venus a milesc. Na argomentazion nia cis senziera sce an conscidra che LS é vegnù boicoté de fat da la provinzia de Bulsan con la benedescion dl consei d’istitut MdR y che les operes sun l standard é vegnudes praticamenter asconudes via da les istituzions culturales de Bulsan (l Dizionar y la Gramatica dl LS manciova a Bulsan sun la meisa olà che al fova metù fora les publicazions de MdR, y ai mancia tla vedrina dl Museum de Tor). Tla fasa finala dl projet SPELL se ova l istitut MdR pité de mete a jì na campagna pro LS, de fat àl fat dl dut per ti taié les giames.

Tl articul-intervista, per finì, ne màncel nience valch "Binsenweisheit", sciche chela che l Dizionar dl LS é "work in progress". Ma ciun dizionar ne é pa nia "work in progress"? Duc i gran dizionars vegn adatés y dés fora regolarmenter per respidlé l’evoluzion dl lingaz; chest vel per l Zingarelli sciche per l Duden o l Oxford dictionary. Les imperfezions dl dizionar y plu en general dl model de ladin standard messessa ester perdret na bona motivazion per sostegnì SPELL y no na vertola per boicoté l LS.

Les idees y propostes dl diretour Moroder ne é nia nueves y nience sies contradizions, nueva é, sce i ne me fale nia, la declarazion de F. Mussner, reporteda tles "Dolomites", che na dezijion finala sun l ladin scrit messarà vegnì touta prest. Bon a l savei; fin a sen à l assessour demé laoré decontra, ma sce al à veramenter intenzion de mudé sia posizion saràl trueps che ti fajarà n aplaus. Fosc pò l daidé te sia reflescion ence la delibera marora y sce ala essa da garaté merita n aplaus ence l ombolt y l consei de comun de Mareo.

SPELL: situazion dl 2004 L decret anti-LS dl Istitut Ladin y dl assessour Mussner ti à tout, do 15 agn, la ofizialité che jiva de uega - UGL y Istitut de Fascia laora inant con sies equipes

Per valch diretour é l Ladin Standard "massa talian" Les vertoles contra l LS é tres les medemes "massa talian", ma chestes ne tegn nia bot

Miec todesch o talian che ladin - An fej dles dutes per entardivé la ora dl standard - N ejempl dla esclujion dl standard

La dezijion de mete te ciazuela l Ladin Standard é perdret bele tomeda de setember dl 2002 tl consei dl istitut MdR con a cef l president Hugo Valentin

Al jola na letra, ma degugn ne la veid - Istituc de romanistica tl'Austria aconsieia dassen de jì inant con l Ladin Standard y ruvé la "paussa de reflescion"

L istitut MdR meina l LS sun la glacia Problems de direzion dl projet - Deguna revijion dl model Schmid dl LS en basa al criter ideologich "massa talian"

L FOLIET DOLOMITEN, 07.06.07

L maiour stuep à fat levé su l consei dl istitut Micurà de Rü

Kulturinstitutsdirektor Leander Moroder