"Sella Ronda Bike Day", trueps, ma nia duc a una
CONFERENZA DE PREJENTAZION PRO LA UTIA MARIA SUN L JOUF DE PORDOI - AI 8 DE MESSEL 2007
La conferenza de prejentazion dl "Sella Ronda Bike Day 2007" é vegnuda metuda a jì pro la utia Maria sun Pordoi con na bela veduda clera y sarena sun i 3000 milesc dles pizes dolomitanes. Al se trata dla seconda outa de chesta manifestazion de rodes entourn ai joufs dolomitans che vegn tegnuda en domenia, ai 8 de messel '07. Endana chest dì vegnirà les stredes soura i joufs sclutes ju al trafich motorisé da les diesc da doman enfin a les trei domesdì. Ales sarà a la leta demé di apascionés dles rodes. Al é na garejeda de orela curta con n dí alalongia degugn auti, degugn fums y degugn pericui sun les stredes. Na garejeda, chilòben, desferenta da les autres, olàche al ne sarà deguna classifica. L spirit animadour é demé chel de sté adum anter apascionés dla roda y dla mont per se giaude deberieda n ambient demarevueia bel y atratif.
A la conferenza stampa sun Pordoi à rejoné l president dla APT de Fascia, Riccardo Franceschetti, l president dla Provinzia de Belun Reolon, l'ex-campion dl mond dles rodes, l trentin Maurizio Fondriest y n zacotant de autri. N fil comun à lié duc chis entervenc: duc à sotrissé l'emportanza de chest aveniment che se deriej tl segn de na domanda nueva fata de natura y de poscibeltés de fé sport, dalonc dal biteboi y dal fracac di auti y dl smog. Na manifestazion, chela dl Sella Ronda Bike Day 2007, endrezeda via da les valedes de Gherdeina, de Badia, de Fodom y de Fascia deberieda che deida a poura nia porté pro a strenje i liams fons tla comunanza ladina y chi dl festide comun per l daciasa. Al ne é enscì nia demé n dì de carater ecologich ma ence n dì de reflescion sun problems economics y culturai per arjonje soluzions deberieda. Al ne mancia samben nia i problems y n valgugn operadours turistics sun i joufs se à declaré dassen contra chestes scomenciadives, palesan sie cruze per l dan economich che pò vegnì ca da scluje ju i joufs dolomitans. Ence Fiorenzo Perathoner, president dl Superski Dolomiti y patron dla utia Maria sun Pordoi, à palesé sie cruze sce chestes giornedes di joufs vegnissa ampliedes y sce al en vegnissa metù a jì tres deplù. A vigni bon cont é trueps unanims y rata che l turism ti agn che vegn deventarà tres deplù n produt con chesta eticheta "natura-pesc-gheneda".
