Siour Toni Beline: na gran personalité tl Friul
Data: 25 April 2007 da les 00:21:15
Tema: Persones


 

Pre Antoni Beline ne é nia plu

Malia Obletter

Encuei (25.04.07) végnel sepolì da les 17.00 tla gliejia de San Merch a Visepente de Basilian pre Toni Beline, olàche al fova plovan dal 1982 inant. La messa vegn zelebreda dal vescul emerit de Udin mons. Alfredo Battisti.  Toni Beline vegn sepolì  tl grem de chela tera che al à tant amé y per chela che al à tant combatù. Na tera che ne é nia demé na mesceida de elemenc inorganics, ma che é cern viva, formeda de eles y de ei con sies speranzes y sies legremes, con sies fatezes y con si soms. Siour Antoni Beline fova n preve furlan che à anter l auter ciancé duta la Bibla tl furlan. Al à metù su l grup "Glesie Furlane" che à dé fora duc i lezionars per zelebré la messa furlana. Al é ence sté n grum de agn l redadour de "Patrie dal Friul" y de sia pena é n mudl de publicazions.

 



Tla nuet anter i 22 y i 23 de auril él mort pre Antoni Beline, scritour furlan de renom. Al fova l animadour dla lia “Glesie furlane” y diretour dl mensil “La Patrie dal Friûl”. Deberieda con pre Checo Placerean òvel enjigné ca la pruma traduzion integrala dla Bibla per furlan. Antoni Beline fova nasciù a Vencion tl 1941, al fova plovan dal 1965 y al à operé tles gliejies de Codroip y spo de Val, de Rualp y de Treli tla Cergnia y daldò te chela de Visepente de Basilian, olàch’al fova dutaorela plovan, condut che al fova melenton de sanité.
Al é daspavent rie da giaté les paroles per splighé cie che i sention te chest moment, per avei perdù n om che nes à dé tant truep, dantaldut, sie ejempl. Nos sperovan che al fossa resté ciamò chilò con nos, ajache al fova ciamò plen de snait, per cie che al ova ciamò tant da dì, y davia che, te d'el, la parola ova la forza dla profezia. Baudi ne él nia juda desche nos essan speré. Pre Toni s'en é ju a ti fé compagnia a Marchet y a Placerean, a Marchi y a Tellini, chi furlans che à dé tant truep y à giaté retù tant puech da sia jent, che a à mostré cler che ormans (umils) ne vuel nia dì sotans che se à batù per che l Friul fossa lede y daciasa de persones ledies.

L miour salut che nos podon ti fé a siour Toni é chel de ne nes dé nia sot y de ne zede nia, ajache ence cheles batalies che someia de puec pò deventé batalies de trueps. Al se trata, desche al ova abú scrit, de "zelebré les glories de n Friul vif y nia les recordanzes de n Friul mort". Al nes speta perchel ence a nos de costruí l Friul nuef y i speron de l fé con la medema fantasia, con la medema creativité, con la medema acorteza y con la medema ironia de siour Toni.

L portaousc dl comité 482/99
Carli Pup, ence colaboradour de Radio Onde Furlane (www.friul.it)

Na intervista dl 2003 de Noeles.net a pre Antoni Beline pòn lieje chilò: n gran combatent per la gauja furlana.







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1468