"Les afermazions de Leitner é fauzes"
Te na mozion al president dl Consei provinzial ova i Freiheitlichen/Liberai acusé l IPL de speises massa autes
Tl articul "Les plures dla jent y les vertoles dla SVP" (ciala dessot) végnel dit che l’afermazion dl assessour competent che l IPL paia n fit per si ofizes ne é nia veira, ajache i ofizes é dla Provinzia. L’afermazion dl Assessour corespon alencontra deplen a la verité, ajache l IPL, per ti ester plu davejin a les scoles ladines à ence n pitl ofize tl Comun de Urtijei, olache al paia n fit, l sciaudament, l puzené y l strom. Ti proscims meisc giatarà l IPL ence n pitl ofize a S. Martin per ti ester ence plu davejin a les scoles dla Val Badia. I nes fajon dassen marevueia che l partit che à firmé chest articul y che dij de sostegnì les mendranzes sdraja ju sun na istituzion ladina che ne fej nia auter che cialé de sostegnì di per di la rejoneda ladina.
L diretour dl IPL, dr. Theodor Rifesser
L sit Noeles.net y la Plata Ladina sun l Alto Adige ova desbuté les critiches di Freiheitlichen/Liberai te n articul: Na touta de posizion fora de mesura é dessegur chela dl partí liberal todesch dla provinzia da Bulsan contra l’Istitut pedagogich ladin (IPL) che à sia senta a Bulsan. Al à fat enfinamai na mozion tl Consei provinzial, ti scrivan a sie president, Riccardo Dello Sbarba. L’IPL ne se merita propi nia na tel critica, ajache al fej dles dutes per ti enjigné ca l material didatich a les scoles. N Istitut che laora y che n’á nia dlaorela per reclams, per mostres de vigni sort y autres iniziatives fora de sie program. Tl Istitut végnel studié, an se confronteia con i autri istituc pedagogics per enjigné ca material che sie aladò di temps (ciala articul dessot).
