Comunicazion di Freiheitlichen
Data: 27 February 2007 da les 18:25:17
Tema: Desvalives


 

Freiheitlichen: "al vegn venù massa cuartiers y terac a jent da foradecà"

La jent dl post mess depierpul vive te cuartiers arconcés su desche cajunciei sun na breia y ence chisc é bendebot cers 

En venders à i scizeri metù a jí a Valsperch na seira de informazion sun i problems che resulteia dal desvene fora nostes valedes y nostes usanzes ai folestiers. L salament dla ciasa Paul Troger fova toch y plen. I reladours, dot. Peter Ortner, l professour architet Andreas Gottlieb Hempel y l ombolt da Toblach Bernhard Mair à duc trat ca chest problem che é entres plu da vedei. "L fabriché fora de mesura, l vene cuartiers a poura nia ai foresc', l desfé nostes beles contredes, l tré adalerch entres plu jent da foradecá che ne vuel nia vive do nost mued de vive, y la unfataria, dut chest ne pò nia plu jí inant enscí", fej alsavei i Freiheitlichen.



"L gran scrai da n venders à dit “STOP” a chisc svilups melsanns. Al é ence per nos n segn che la jent se sent arbandoneda y nia plu al segur. Nos nes on entres paré contra chesta politica da fabriché dla Svp, ma te sia superbia ne se àla mai degné de nes mete averda a nos pici. I son ruvés tant inant che te valch paisc ne pò nosta jent nia plu se empermete da sté, davia che les sourasperses da fabriché é true massa ceres. Ence i cuartiers popolars che ti someia aluesc a cajunciei arconcés sun na breia costa entratant bendebot de moneides. La jent te Gherdeina y su per l’ Alta à bele nout: chi che davagna dancialà y s’en aprofiteia é puec. I autri mess duc cialé pro desche de tel scuriés. I dinés, i dinés, dut demé per l Die dl diné. Se vene l'anima ne pèrel che sie plu degun picé. Les normes sun l fabriché mess vegní scrites da nuef!", ghira i Freiheitlichen.
"La SVP ne veid nia ite cie dann che ala fej, a d'ela ti é dut entres unfat, ala pò dut. Ai pici ne ti ciàlela bele die nia plu, y i gragn à dagnora sapù co. Medret fé gran y medret volei ester gragn. La seira da Valsperch a mostré che sen él la popolazion che mess se fé inant, mess se defene enstessa. Dadie onse nos bele dit che la gran politica ciala demé sun l gran grum. Sce nos tegnon duc adum, spo saronse bogn de devenje chest malester", scluj ju i Freiheitlichen sie comunicat.
 
 





L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1426