Referendum a souramont
Data: 17 February 2007 da les 23:35:35
Tema: Politica


 

Les unions ladines da souramont: enviede via l referendum!

I trei comuns Ampez, Col y Fodom vegn damanés de envié via la prozedura

Cristina Lezuo - Presidenta dla Union di Ladins da FodomPaola Agostini - presidenta dla Union di Ladins da ColSiro Bigontina - President dla Union di Ladis de AnpezoL gran vare é vegnù dé. Les Unions di Ladins di trei comuns de Fodom, Col y Ampez ti à mané a les aministrazions la domanda ofiziala percie che al vegne fat n referendum per damané de podei tourné con Bulsan.

Cristina Lezuo (Fodom), Paola Agostini (Col) y Siro Bigontina (Ampez).

 



N document unitar, mai ciamò vegnù dant y che an se aspetova oramai da valch meis. "Les Unions di Ladins de Ampez, Fodom y Col", liejen tla letra, "à dagnora abù te sie spirit y ti fins de sia ativité chel de chirì l’unité con les autres vals ladines dl Sela, per via dla storia, cultura y lingaz che les lieia. Do 420 agn de unité sot al Tirol y do la fin de la Pruma Vera, atuova l rejim fascist tl 1923 la despartizion dles vals ladines tres l’agregazion di trei comuns de Fodom, Col y Ampez pro la Provinzia de Belun y a la Region dl Venet, contra la volonté dla popolazion. Al articul 2 dl acord italo-todesch, aprové a Roma ai 21 de otober dl 1939 dal govern fascist y chel todesch, é l raion di trei comuns vegnù declaré "mistilingue", al à patì les opzions desche l Sudtirol y da setember dl 1943 enfin a la fin dla Seconda Vera él endò vegnù lié a la Provinzia de Bulsan." "A la fin dla Seconda Vera", scriv inant les Unions, "sonse endò vegnus agreghés a la Provinzia de Belun y a la Region dl Venet. Al é nasciù l moviment "Zent Ladina Dolomites" che à porté a la gran enconteda sun Jouf dl Sela ai 14 de messel dl 1946 per damané con forza la reagregazion al Trentin Adesc Aut. Purempò ai 5 de setember dl 1946, per efet di acords De Gasperi-Gruber, é chela gran aspirazion vegnuda destudeda y al é vegnù confermé la despartizion." Do la vera, te deplù ocajions (tl 1947, 1964, 1973 y 1977 ), à i trei Comuns, con spezifiches deliberes, damané, adum o despartis, l’agregazion a la Region Trentin Adesc Aut per motivazions storiches, economiches y culturales. La mendranza ladina di trei comuns de Ampez, de Col y de Fodom, che ne à nia les medemes sconanzes di fredesc che viv tla Region Trentin-Sudtirol, é do a vegnì derobés de si valours y l dann maiour é chel dla espulsion di aciasés, tres plu sofoiés y obliés a subì imposizions da foradecà. Tres la mudazion dl art 132, coma 2 dla Costituzion (lege costituzionala n.3 dl 2001 ) y dantaldut per merit dla sentenza n. 28 de otober 2004 dla Court Costituzionala, che à declaré ilegitim l'art.42 2° coma dla lege 25 de mei 1970 n.32, pòn tres n referendum damané de mudé Region. Per chest, scluj ju les trei Unions, se damàneles che les aministrazions mete a jì deberieda ti trei comuns n referendum per fé tourné adum chisc teritores sot a la Region Trentin-Sudtirol, ingiustamenter despartis do la Pruma Vera y contra la volonté dla popolazion, agreghés a la Region dl Venet. N at de dovei, végnel scrit, do 83 agn de struscies. Per ti dé peis a la domanda él ence vegnù lié pro dejenuef documenc storics.

Lorenzo Soratroi

 

 

 Referendum a souramont per gní permez a la provinzia de Bulsan
 Referendum - Luigi Chiocchetti: Lamon à gaujes economiches, Souramont à gaujes storiches
 Fodom: na valeda lasceda die sun na pert
 Lamon vuel vegnì con Trent, ma encuei apeina Souramont y Fascia con Bulsan
 Prospetives per n referendum: sen nia l dret moment
 Referendum: Lamon vuel jì con Trent
 






L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1418