Mendranzes ne vegn nia dagnora tratedes unfat, nience tl medem stat
Data: 09 February 2007 da les 18:45:22
Tema: Politica


 

I fis legitims  y i fis basterc

Depierpul che l govern Prodi à taié dl 50% les alogazions finanziares a la lege 482/99 àl aumenté de cotant les alogazions a la mendranza taliana tla Slovenia y tla Croazia

La mendranza taliana tla Slovenia y tla Croazia ne pò nia se baudié, al contrar ala pò se paré valch caprizes. I governs de Roma, de Lubiana y de Zagabria à tout la dezijion de arcresce valgamia les alogazions finanziares a ben di 33 mile talians che viv viadelà dal confin, olàche al oresc soredl. Tres n emendament a la lege finanziara, dé pro puech dant Nadel, ti à l govern Prodi asseguré a la mendranza taliana 4 milions y 650 mile euro vigni ann dal 2007 al 2009. Tl medem temp à Prodi depierpul scurté les alogazions a les mendranzes nazionales tres la lege 482/99 damprovia dl 50% enfin al 2009. 



La lege 193/04 veid dant dinés sibe per i talians tla Slovenia che tla Croazia y a ben dles assoziazions di sciampés da cheles teres do da la Seconda Vera mondiala (a chestes ti végnel aloghé 1 milion y 550 euro al ann). Ence la 193/04 ova manacé de vegnì desvuededa di mesums finanziars. Enfin al ultim ova l'Union taliana tla Slovenia y tla Croazia abù poura de ne podei nia plu endrezé via sies iniziatives che vegn despliedes tla Istria, tla Dalmazia, tl Cuarnar y tla Slavonia per tegnì viva la "italianità". Chest ne é nia suzedù. Prodi ti à aumenté i fonds ai talians tla Slovenia y tla Croazia. Depierpul àl taié i fonds dla lege 482/99 a les mendranzes tla Talia de ben l 50%. N gran sperdon per feter dutes les mendranzes che depen dal finanziament tres chesta lege. Ence Lubiana (Slovenia) fej sia pert, garantian per eniann (2007) n 2,1% en plu. De bones nueves tamben da Zagabria: l govern croat sot a  Ivo Sanader à mantegnù sies empromiscions fates en l'ann passé a Radin: n plu dl 18% envers al ann passé, oben 1 milion 150 mile euro ti jirà ence da chesta cassa a la mendranza taliana. (Informazions sourantoutes da www.lenghe.net)

Glossar:

sperdon = sperduda







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1409