Do mile agn de storia na ela a cef de "Ra Regoles" de Ampez
Al é Cinzia Ghedina - L comun de Ampez se desten sun 25.000 etars: 7.000 é crep demane publich, 2000 etars é terac privat y ben 15.000 etars é proprieté de "Ra Regoles"
Per la pruma outa te sia storia - longia oramai plu de mile agn - arà les Regoles Ampezanes na ela desche presidenta. Ai 25 de setember à la Deputazion azeté la letra maneda dal President da dant, l injinier Alberto Lancedelli Ieza, che à abù da zede do les chestions gnudes fora con i laours su per la pista de La Tofanina, y con tredesc oujes fates bones é Cinzia Ghedina deventeda presidenta.
La Ciasa de "Ra Regoles" con i blasons dles vejinanzes che fej pert.
Cinzia Ghedina é fia de Ugo de Antonia y à puech plu de 40 agn. Ala se à laureé te economia y comerz y plu tert ence te letres y ala laora da agn te na banca de Ampez. Pro les Regoles s'en capéscela ormai fora, nia demé aja che ala é tla Deputazion da chest ann inant, ma ala ova bele abù soura l'enciaria de presidenta di revisours di conc y dl zenter cultural dal 1998 enfin al 2004, sot a la aministrazion de Zesare Lacedelli de Mente. Enfin al ann passé da Nadel éla ence steda presidenta dla comiscion che à laoré die pro na proposta de laudo nuef che la Foula Granda (la enconteda de duc i regoliers ampezans) ne à endere nia azeté. Avei metù a governé les Regoles na ela desche Cinzia Ghedina che se à bele davagné la stima sie giudize pratich con tó dezijions damprovia, é n vare inant tla politica regoliera. An spera che al joe y mude fora valch tla comunanza, tres tl respet dla tradizion che la tegn adum da secui. A la presidenta nueva che ne à dessegur nia dagnora abú na vita saurida onse l plajei de ti fé n augure de podei laoré polit y de tegnì dur per l ben dles Regoles y de duc i regoliers. (em)
-
