Ladins da souramont ortia na letra a Belun
Data: 10 February 2003 da les 16:11:38
Tema: Politica


 

I ladins da souramont damana la provinzia de Belun de reconesce la Generela sciche organism de coordinament - L medem s'aspéten da la provinzia da Bulsan

de Lorenzo Soratroi

Les Unions di trei comuns ladins tla provinzia de Belun vuel resté liedes dassen a la Generela, sceben che decà dai joufs vuel trueps les despartì da cheles comunités dl Sela a cheles che ales é liedes per cultura y tradizions da vedlamenter. Per se seguré n iade deplù chest liam à Nani Pellegrini, President dl'Union di Ladins da Fodom, mené na letra a la Provinzia de Belun per mans dl President dl Consei Provinzial, Daniela Larese Filon,  solezitan l ent de Palazzo Piloni a tò atira dezijions de chest vers. La "Lege Cheder" 482/99  al articul 3 coma 3, sotrisseia Pellegrini, dij che les Provinzies pò reconesce i organisms de coordinament y de proposta per les mendranzes despartides fora sun teritores provinziai y regionai desvalifs. Sun l retrat: la presidenta dl'Union Generala di Ladins dles Dolomites, Hilda Pizzinini.

 



Un de chisc organisms, sotrisseia Nani, é propi la Generela, y l’Union di Ladins da Fodom, adum con cheles de Ampez y Col, é na sia sezion fin da canche ala é vegnuda metuda su.

La Lege Cheder é vegnuda aproeda a la fin dl 1999 y da plu de n ann à la Provinzia dezedù la perimetrazion di comuns ladins, coche la lege 482/99 preveid, ma de na dezijion soura l reconesciment dla Generela ne àn nia ciamò descorù, se lamenteia Pellegrini.

Y per dì chest recòrdel a la Provinzia che la lege rejona clermenter: "tl temp de nonanta dis da canche al é ruvé la domanda, à la Provinzia l dovei de se pronunzié, aldò de chel che l art.1 coma 4 e 7 del D.P.R. del 2 de mei, n. 345 preveid, y per fé chest, ne él nia debujegn de avei l’autorisazion da pert de degunes istituzions".

Al é n at concret chel che vegn damané dai trei comuns, che ei vae a se enjonté a chel bele reconesciù dal Consei Provinzial, che à dit che " les comunités de Fodom, Col y Ampez é retegnudes storicamenter enraijedes y destachedes y che ales fej pert di Ladins dl Sela per cultura, identité y coscienza". Tla letra pòn inant lieje che l’Union di Ladins da Fodom se à cruzié per la puecia atenzion che la Provinzia de Belun mostra per les comunités ladines di trei comuns.

Al restarà da vedei cie che Belun responarà, sce al vegnirà responù. Na roba é segura, che Belun ne podarà nia fé demanco de tegnì en consciderazion l vare de chest vers, n vare che Trent à bele fat da temp y che an se aspeta ence tost da Bulsan. Podarà la provinzia che à "fondé" sia politica de autonomia sun les mendranzes, jì do n auter troi respet a cheles dlongia, che de tradizion y de cultura de autonomia y de atenzion per les mendránze à demè da podei ti ensigné a chi che viv dlongia l Piave?







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=129