Publicazion nueva sun l alpinism feminil
Data: 16 May 2006 da les 19:01:23
Tema: Fascia


 

L'arpejon dles eles tl alpinism

L liber "Pareti Rosa" porta dant l svilup dl alpinism dles eles dal scomenz enfin a encuei, anter chestes ence alpinistes ladines

Dant a puec dis é juda a piz la 54 edizion dl "filmfestival della Montagna de Trent" y ciamò na outa é la zité de Trent steda per n valgugn dis al zenter dl mond alpinistich nazional y internazional. Na bela edizion ence per merit de na bela cumpeida de vijitadours y de spetadours ai desvalifs evenc che ti à fat tré n bilanz scialdi positif ai organisadours. Anter i desvalifs apuntamenc él sté la prejentazion dl liber "Pareti Rosa - le alpiniste trentine di ieri e oggi" dé fora da la SAT y publiché sun interessament dla Provinzia de Trent.



N liber plajoul, propi na bela publicazion che rejona dl alpinism y souraldut  dles eles, de eles fortes y dassen liedes a l'arpejon da mont y a si valours. An pò dí che ence tl alpinism à la ela dé de gran varesc inant  tl temp. I costums se à mudé te chisc agn ence tl mond dl alpinism y les eles à sapù da se fé valei. L liber é gnù metù adum da Riccardo Decarli con n pream dla gran alpinista Silvia Metzeltin Buscaini. Al é laite valgamia trueps retrac de alpinistes trentines, anter chestes samben ence de eles fascianes che à scrit plates y plates tla storia dl apinism desche gran guides de valour. Tl liber él alencontra se àn dessegur ence desmentié via valch personaje de encueicondí ma chest ne ti tol nia valuta a la publicazion. L liber porta dant l svilup dl alpinism dles eles dal scomenz enfin a encuei, lascian vedei duc i mudamenc y duc i varesc fac da les eles te n ciamp olàche les eles fova dessegur dagnora na mendranza. Ma i varesc inant é stés cotanc y l'alpinism trentin à na storia dles eles che pò se lascé vedei y che é bela da lieje tres.

      Per cie che reverda Fascia végnel recordé te chest liber Pia Piaz Bruneri, fia de Tita Piaz, nasciuda dl 1904 y trapasseda dl 1975. Pia, fia d'ert dl "gran diau dles Dolomites" a manejé agn a la longia desvalives uties da mont: chela de Fauzares, chela de Plan Trevisan y chela dl Gartl. Ala é steda una dles prums eles a se rampiné sun l Ciampanil Bas tl Brenta. L liber rejona ence dla bravia y apascioneda de creps, Rina Chiocchetti, de Moena, clameda "la Rina", impegneda tl mond dl volontariat per daidé chi manco "fortunés" y ence dret conesciuda desche gran arpizadoura che à fat arpizedes adum con i miours alpinisc´ di agn sessanta y setanta. Does figures de eles apascionedes dla mont y di creps: l liber de Decarli met en luster ence eles desche duta la storia dles eles sa mont dl Trentin. Propi n bel liber da lieje y da ti cialé tres. Domenico Volcan.







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1252