Lois Trebo: esternazions meltentopedes
Data: 16 May 2006 da les 18:58:13
Tema: Politica


 

"Chi che ne vuel nia ester talians y a chi che ala ne ti scusa nia chilò, po s'en tabaché viaifora"

Con chestes paroles scrites te na newsletter "Perlae Ladine" à l President dla Generela, Michil Costa, ficé te n vespé

Sce an damana la jent, sce ala conesc la Union Generela, spo sàla ben da dì che ala dà fora dal 1972 encà l foliet ladin - La Usc di Ladins; ma ala ne capesc nia, a cie moda che Bulsan o de chi dla SVP l'à su con la Generela; cindetant végnel envié via critiches che à puecia fondamenta. An à l'imprescion desche la SVP adora vigni mez ann na biescia rossa per podei dramé ju; con la SVP mini ie ladins dla SVP.

Da sen inant fírmel les newsletters desche Penna Libera J. MacLadimpede. 


 



Petizion y reazion
Al é da valch edema encà che an po lieje articui che la lascia gracé ju per la Generela; ai porta critiches che persones politiches dla SVP à fat. La gauja é la cherta che l'ostier dl hotel La Perla, Michil Costa, ti à mané fora a si clienc; te chesta àl critiché la firma de ombolc ladins sot a la petizion metuda dant dai scizeri per che al gnissa metù tla Costituzion dl'Austria - Viena romagn sconadoura dles mendranzes de Südtirol! Veir él che encuei ne firmassa deplù ombolc nia plu la petizion, davia che ala ne fova nia metuda ju per i ladins (Cf. La Usc 04.02.06 Firmes dai ombolc - n scandal?). Tles chestions di todesc ne nes ficionse nia ite. Cie che l'ostier de La Perla à ciamò scrit (a chi che ala ne ti scusa nia chilò, chi po s'an tabaché viaifora) é dessegur stedes paroles melentopedes. Na talpina ti à mané chesta cherta a zachei de Bulsan y chestes paroles á fat gran stuep pro i todesc. La chestion é ruveda tl Consei Provinzial da pert de Franz Pahl y l'assessour ladin à messù ti respone. Pahl damanova enfinamai, sce al fossa ben ciamò l caje da ti dé contribuc a la Generela - na domanda che ofen i ladins. Mussner à metù fora che Michil Costa ne conesc nia la storia y n'à nia tout su la cherta desche cherta dla persona privata Costa.
Ne fossa Michil Costa nia tl medem temp sourastant dla Generela, ne essa degugn dit nia de sia cherta ironica. Va ben, n malentop pò ti suzede a duc y Michil Costa se l arà dessegur scrit do les oredles. La domanda de Pahl sun i contribuc a la Generela desmostra che al ne sà nia cie che la Generela à fat y fej dutaorela per i Ladins. I podon ti mané a Pahl l liber de
Cristina De Grandi sun la storia dla Generela, spo podéssel s'informé sun la funzion dla Generela per la salvanza dl grup ladin dles Dolomites. Ma chest liber fajessa ben a duc i Ladins, nia demé a chi dla politica da se lieje fora; spo la pensàssei autramenter defront a la Generela y se sentissa desche ladins cotant plu bravi.

Daidé demé i prosc?
Na pert ite a Bulsan à n burt sistem: sce te me criticheies, spo ne te dài nia plu contribuc! Pu, de chi é pa i scioldi di contribuc? Al é nostes coutes che i paion ite y na pert miena da i podei partí fora a chi che ti é l plu simpatics, a chi che ti fej les beles - i autri dess gni ciastiés! Pu santa stopa, i ne saron mine tant inant? Co ti dijòven olache al gniva pratiché regolarmenter chest sistem? Viadò la cortina de fer! Chela é sparida y an spera che chi sistems sie ence morc fora per tres. La Generela à fat n bel gran laour: daidé tegnì adum la popolazion ladina che fossa cotant deplù spidiceda su zenza Generela. Che ala dà fora da 34 agn encà l foliet ladin, chel é dret n gran merit; rodunt chi che criticheia la Generela ne sà nia, cie sforc che al é gnù fat, cie combatudes che al à volù ester. Chest ves dij na persona che laora dal 1966 encà per l foliet ladin y n'é dutaorela nia bona da zede, aja che la salvanza di Ladins ti stà massa a cuer. I Ladins y sies istituzions y lies adora l'aiut dla man publica che ne dess nia ti cialé tl mus a la istituzion, ma a si fins.

La Generela fej politica
Samben che la Generela à fat y fej sia politica. Ala é gnuda y vegn sforzeda de la fé, davia che i partis - la SVP, ma baudi ence i ombolc se lava les mans defront ai problems ladins, ai ciala demé dla economia, ma nia dla etnia ladina, dl popul ladin che viv tles cinch valedes. Fajessa pu i ombolc politica ladina y se cruziàssei pu di problems ladins, la Generela fossa la pruma a ester plu che liegra de nia plu messei se festidié di problems politics ladins. Ai cie bel, sce ala essa demé bria da se interessé dla cultura ladina!  Al é meisc che Durnwalder à cherdé ite i ombolc ladins, ma ai ne é nia bogn da levé su de sie scagn y da se senté adum per analisé les chestions ladines davertes y tantes che al en fossa. Ai n'á nience l coraje da dì - nos ne fajon nia politica ladina, fajede demé vos inant. I spere che zachei di ombolc se dae da fé - enscì ne vàla nia inant, al é gran ora, i ladins vegn coienés sce i la lascion jí inant enscì - zenza ne fé nia!
Dedeves na sburla, pensede al ben de vosta jent; ence l partì fej na burta figura, sce si membri ne se dà nia da fé per la comunité ladina.

Lois Trebo

 

 







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1251