Consei de Formazion de Badia: envit con informazion sun l ladin standard
Data: 04 May 2006 da les 17:17:59
Tema: Ladin Standard


 

Barometer dl lingaz ladin 

Enrescida dl ASTAT tles valedes de Gherdeina y de Badia en relazion al lingaz ladin scrit unifiché - Resultac publichés de fauré 2006

L’ASTAT à publiché de fauré i resultac sun l’adoranza y l’identité linguistica te Südtirol. Te chesta enrescida él ence vegnù analisé la situazion dl lingaz ladin tla Val Gherdeina y tla Val Badia y plu en particolar cie che la jent en pensa de n lingaz ladin scrit unifiché. La enrescida é vegnuda fata tl ann 2004 y publicheda de fauré 2006.

ASTAT, l ofize de statistica dla provinzia de Bulsan.

 



Chilò ciàpen na descrizion dla realté linguistica, che pò ester interessanta y de utl per na bona politica linguistica ladina. Ma an mess samben dì che al mancia te chesta enrescida les autres valedes dla Ladinia.
I resultac dla enrescida é da ciapé sun l liber numer 123 dl ASTAT, con l titul Südtiroler Sprachbarometer/Barometro linguistico dell’Alto Adige, y sun chesta adressa internet: www.provinz.bz.it/astat
 
Ie tole chilò fora na domanda che reverda l lingaz unifiché.
Seise per n lingaz unifiché? 
 
 
 

 

 

 

 

 

 

 

 

 

 

 

Te chesta grafica vedonse les respostes desfarenziedes per valeda.

Sce an cumpeida adum les does valedes ladines de Gherdeina y Badia végnel fora l
38,5% per n lingaz ladin scrit unifiché,
47,9% de contra y
13,6% pesimeia.
 
Ence sce te chesta enrescida la davagna chi che é contra l ladin unifiché per zirca 9 ponc %, pensi empò che l  38,5 % per n lingaz scrit unifiché ne sie nia tant puech; él pu l prum iade che al vegn fat na tel enrescida, almanco tant che ie se. An pò speré che tla proscima enrescida, te 5 o 10 agn, l lingaz scrit  unifiché vegne azeté da na majera cumpeida de jent. 
 
En  vender, ai 12 de mei, da les 15.00 , saràl tla Ciasa de Cultura a La Ila la prejentazion de chesta enrescida dl ASTAT.
Angela Giungaio, coautoura dla enrescida, prejentarà i resultac.
Da pert de linguisć y de desvalives istituzions culturales y forzes politiches provaràn de analisé y interpreté i resultac dla enrescida. Duc i interssés é enviés a tò pert a chest domesdí dediché a nost lingaz ladin.
Organisazion: Consei de Formazion dl Comun de Badia
 
 

Lois Castlunger





L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1245