Laours publics: miorament dl trat pont de Fer
Data: 12 April 2006 da les 19:28:13
Tema: Val Badia


 

Streda dla Val Badia: sen tóchel al pont de Fer

Streda anter Mantena Todescia y Lungega endò sareda dai 18 de auril enfin ai 29 de messel - N tunel y n pont nuef dess mioré l transiament  - I laours peia via ai 19 de auril

"Spostan la streda y realisan n pont nuef ciàfien da mioré de cotant les carateristiches tecniches dla streda sciche per ejempl la cleva (pendenza), l rai dla outa y la largheza y enscí pòl ence vegnì garantì na majera segureza sun chest trat de streda” à dit l assessorat ai laours publics. I laours metarà man ai 19 d’auril. “Chest termin é gnù fat fora deberieda con i comuns dla Val Badia per limité i problems de trafich ch’al podessa gnì a se l dè entratant chisc dis de festes da Pasca.”

Dai 19 de auril enfin ai 29 de messel végnel endò sclut la streda per porté a termen i laours.

 



L projet de costruzion reverda l trat de streda de apresciapuech 2,4 chilometri a nord dla localité Pedraces. L plan preveid n tunel che taia tres l laston de crep olà che la streda esistenta roda entournvia fajan na outa dret strenta. L tunel nuef arà na lungheza de 422 metri. Tres n pont a doi pilastri de na auteza de 57,7 metri passarà spo la trassa soura la Gran Ega via, atraversan la streda statala esistenta y se colian spo pro la pruma outa con la streda da sen.

I laours de costruzion vegn realisés da la dita de costruzions Oberosler Cav. Pietro AG da San Laurenz y gnirà a costè 5,6 milions de euro. I laours mess gnì portés a termen aladò dl contrat anter 600 dis.  Entratant i laours de costruzion végnel garantì che i auti posse passé s’anuzan dla streda esistenta. L injinier Gustav Mischì dl ofize provinzial Strades nord-ost é responsabel dl projet y di laours.  

Streda dla Val Badia anter Mantena Todescia y Lungega
Do les festes da Pasca gnirà l trafich sun la streda dla Val Badia endò restrent. Da en mertesc, ai 18 d’auril da les 6.00 inant enfin ai 28 de messel 2006 podarà la streda anter Mantena Todescia y Lungega (km 2,6 enfin a km 9,5) demé plu vegnì adoreda dal trafich pesoch. I auti messarà depierpul transié sun les stredes panoramiches. “Chestes limitazions va debujegn per podei porté a termen i laours de comedura y de costruzion sun chest trat de streda”.






L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1236