Les paroles dl ann
Data: 26 January 2006 da les 20:41:08
Tema: Desvalives


 

I joufs, l stuep fin y l numer set

chestes é les paroles dl ann che respiedla a cie che i grups linguistics ti à dé l majer peis o che ti à fat plu festide entratant l ann 2005 - sensibeltés desvalives

Ai prums de jené é ence i südtiroleisc y les südtiroleises vegnus cherdés su a dé ju sia preferenza sun la parola dl ann todescia, taliana y ladina. I organisadours dl’iniziativa, l Zenter Linguistich dl Südtiroler Kulturinstitut, l Istitut de Comunicazion Spezialistica y Plurilinguism dl’Eurac y l Zenter d’Archirida linguistica dl'Université Ledia de Bulsan à coiù adum 504 preferenzes y 286 paroles dl ann. L resultat che é gnú prejenté ai 26 de jené entratant la conferenza stampa depen da les preferenzes manedes ite y da les dezijions toutes da na juria metuda adum da 9 espertes y esperc dles istituzions che à tout pert a l’iniziativa.



La parola dl ann é na parola che à influenzé la discuscion publica te Südtirol y la fetra parola dl ann é n eufemism che ascon viadedò na bela descrizion de na realté manco plajoula.
Anter les propostes manedes ite da la jent à la juria chirì fora sciche parola ladina dl ann 2005 la parora joufs, souradut per la chestion lieda a la proposta de sotmete i joufs entourn l Sela a n daz.

 
Al secont post él gnú metú la parola ciaspes, ajache chesta vedla parola ladina é gnuda redescorida da trueps amatours dl sport y dla natura. Al terz post giatonse couta dl turism/ciasa clima, dant da d’autres paroles desche “ciasa Clima”, “tunel” y “consei di ombolc”. „Streda panoramica“ é enultima la fetra parola ladina dl 2005. Les paroles talianes é liedes a les lites, y dantaldut a la zité de Bulsan. La parola dl ann taliana é perchel l numer set („sette“), set desche les set oujes che ti manciova ai partis de man dreta da les lites de mei. Al secont post giatonse „targhe alterne“, per gauja dl transiament scomané, y „rate“ al terz post – che fej alujion a tant de families te Südtirol che paia tres plu gonot te rates. La fetra parola taliana dl ann é „corsia dinamica“.
La parola todescia dl ann é per i südtiroleisc todesc dessegur „Feinstaub“ (stuep fin).Al secont post encontonse la parola „Vinschger Bahn“ (ferata dl Venost) y al terz post „KlimaHaus“(Ciasa clima). Sciche fetra parola dl ann à la juria chirì fora anter truepes propostes la parola: “Fahrsicherheitszentrum” (zenter de segurté stradala) y „dynamische Spur“ (striara dinamica).

 
Ence sce tla Talia é l’iniziativa “Wort und Unwort des Jahres” (la parola dl ann y la fetra parola dl ann) ciamò puech conesciuda, vegn chesta iniziativa organiseda bele dal 1971 ti Paisc Todesc y dal 1999 tl'Austria. Per la situazion linguistica y sozio-politica particolara te Südtirol, fòvel ben cler che chesta iniziativa vegnissa porteda inant ence chilò da nos. „La cossa plu emportanta de chesta iniziativa“ sotrisseia i organisadours, „fova dantadut stimolé la coscienza linguistica di südtiroleisc y dles sudtiroleises y fé a na moda che la jent pensassa soura l’adoranza dl lingaz. Por chesta rejon voléssei ciamò rengrazié duc chi che à tout pert a la iniziativa y à mané ite sies propostes per la parola dl ann.“
 
Les paroles ladines dl ann 2005 te Südtirol
 
joufs
ciaspes
couta sun l turism
 
La fetra parola dl ann: streda panoramica
 
Die Südtiroler Wörter des Jahres 2005 in deutscher Sprache
 
Feinstaub
Vinschger Bahn
KlimaHaus

Unwort des Jahres: Fahrsicherheitszentrum und dynamische Spur

Le parole dell’anno 2005 in Alto Adige in lingua italiana
 
sette
targhe alterne
rate

“Parola mancata” dell’anno: corsia dinamica






L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1197