La sburla gnirà da souramont

Truepes speranzes vegn metudes tla lege 482/99 y ti ladins da Souramont y fascians

Tla plata dl iade da denant (Alto Adige y noeles.net) fova l referendum tema zentral, tema envié via da Lois Trebo. An podova lieje sia minonga y chela de d'autres does persones. Les minonghes va bendebot endalauter. Truep depen dal cianton de veduda. Al desplej messei l dí: la storia conta plu puech, ala é na maestra zenza scolés.

I joegn taia curt, per ei conta l encuei y dantaldut  l aspet economich, l laour, l ciamp olàche ai pò brancé ite ei enstesc, al conta la spezialisazion per l suzes. Ai taia curt con la storia, con la gliejia, con les tradizions y con enchersciadums. Ai ciala a cie che á significat encuei, a cie che va miec encuei y é plu saurí da arjonje. Samben él falé, davia che n popul zenza storia n'á nia n davegnì. Ma chesta é la filosofia dla generazion nueva. I litadours pro i referendums sarà joegn che ne conesc nia nosta storia, perchel ne pòl nia ester la motivazion per conduje i jogn al referendum positif chela dla storia, ma chela dla economia, dla forza, dla organisazion, dla proprieté. Nes unì vuel dí gni stersc, podei defene nosc capitai, organisé nosc turism, vardè nosta tera.
L'imprescion che an á, é chela che chisc valours sie souradut prejenc pro i ladins da Souramunt, de Fascia y per na pert ence tla Val Badia. Te Gherdeina veiden chisc valours pro la Union di Ladins. La Svp de Gherdeina ne n'á nia na politica ladina, ala é todescia y basta. Ma chest ne nes sperd nia. La soluzion dl problem dla unité ladina gnirà da chi da Souramunt enstesc y dai Fascians. La lege 482/99 ti dà na man y pernanche ai sarà datant de mete en pe l comité de coordinament vedù dantfora da la lege, vedaràn tost i fruc dla evoluzion. Viadededò él n Stat y nia demè na Provinzia y a nia ne jovarà l sforz de Mussner de arferé ju la vueia y la prescia de chi da Souramunt.
 Al gnirà rejoné di ladins a livel regional y nia demè, desche al é suzedù enfin a sen, tles stues o tles ciasesdafuech. An nes conesciarà y capirà tres miec tres contac nuefs y propi da chisc contac gniràl propostes nueves y conseis per na politica nueva interladina. N dilan ai ladins da souramunt per la sburla. (jp)