Noeles.net - Informazion ladina - Esposizion de comics dl artist fascian Manuel Riz

"Scedola" ruva tl Ciastel de Tor

Chest vender enaudazion da les 18.00 - I comics de Manuel Riz: dessegns fac con fantasia che fej vedei la sozieté con uedl critich

En chest vender, ai 7 de otober, vegniràl daurí da les 6 da seira tl Museum Ladin a San Martin de Tor na mostra de dessegns de "Scedola", l personaje di comics cheriés da Manuel Riz. Te chesta ocajion vegniràl ence prejenté la publicazion con chela che l museum ladin ne vuel nia demé fé conesce l artist, ma ence prejenté chest medium artistich particolar che é chel di comics.

La realisazion fina di dessegns de damana conescenzes tecniches tl ert da adoré l raisplais y capazités de osservazin, richeza de idees y fantasia, liés a na certa ironia. I dessegns dess devertí y vegn acompagnés da n juech de paroles che porta pro che la sozieté vegne veduda con uedl critich.
Dutes chestes carateristiches pòn vedei ti dessegns dla figura de "Scedola", n personaje che duc conesc da les plates tla Usc di Ladins. Manuel Riz à davagné con sies capazités creatives trueps pesc' en ocajion de concursc per dessegns comics, enscì n pest pro la "Biennale internazionale dell'Umorismo nell'arte" a Tolentino. Al à ence tout pert al Festival Acquaviva del fumetto tla provinzia de Ascoli Piceno.
La mostra sarà da vedei enfin ai 30 de otober 2005 dal mertesc a la sabeda da les 10.00 a les 18.00 y la domenia da les 14.00 a les 18.00. L Museum Ladin envieia duc canc a la daurida, coche dit en vender da les 18.00 tl Museum Ladin a San Martin de Tor.