Les vertoles entortes de Durnwalder

La Union Generela é la soula union o istituzion che se à impegné per i ladins de dutes les provinzies, souravarian enscì la tripartizion fascista. Chesta sarà ben ence la gauja che la UG vegn ciastieda da la politica SVP. La Union Generela à fat per i ladins cotant deplù che la SVP, cie che la SVP se stenta dassen da reconesce. Enscì ova la Union Generela concuisté tres tratatives a Roma la rejon de lingaz aministratif (a Bulsan volòven ti lascé ai ladins la rejon da avei sce en caje n tradutour, rejon che ence i imigrés à: i ladins fossa romagnus al livel giuridich di marochins).
Durnwalder rejona ence de na “raprejentanza” politica tl contest dla lege 482/99, cie che ti stessa te troi al reconesciment dla Generela. Na vertola bonmarcé. Tla lege ne stal scrit nia de “politich”. La lege rejona de “organismi”, al n’é inió scrit valch de “raprejentanza”. Chesta é demé na invezion dla SVP per saboté la Union Generela – n segn che la SVP n’é nia bona da respeté opinions politiches che é desvalives da les sies, y chest é n gran segn de meseria culturala y politica.
Sce an volessa veramenter avei na raprejentanza politica, sciche Durnwalder dij, spo audìssel da fé lites – con n certl lital souraprovinzial. Tò ca i ombolc é a vigni moda na coieneda: can consulteia pa Durnwalder i ombolc te chestions de cultura todescia o unité dl Tirol? Mai!
Ala se trata de porì invenzions ad hoc per descriminé i ladins y tegnì inant alaut la tripartizion. Chela soula union che laora soura i confins dla tripartizion fascista fora auda da ester reconesciuda sce an ne vuel nia messei se lascé tré dant sostegn per chesta tripartizion. (tm)