I joufs ladins: Mussner vuel mete su les stanges
Data: 04 August 2005 da les 14:14:55
Tema: Politica


 

I joufs dolomitans lieia dantaldut les valedes

L plan dla Svp ne tegn net nia cont che i joufs é les vies prinzipales anter les valedes ladines - Contac interladins a paiament tl davegní? - Deguna union ne à protesté enfin a sen

Saré ju i joufs dolomitans al trafich lede y tré ite na sort de daz per passé, chest é l plan dl assessour Mussner che ruva tres endò sun la stampa. El se imagineia enfinamai che les prumes stanges posse vegnì metudes su dl 2007. 

L davegní dl trafich anter les valedes ladines, dant vigni jouf na stazion dl daz con stanges dant?

 



Les autres provinzies, Trent y Belun, ne veid chest plan daldut nia de bon uedl, nience la Val Badia. La Academia Europea (AE) de Bulsan à fat n stude che ti dà samben  sostegn a la politica dla Svp.

Te duta la chestion ne él endere mai gnù trat ca clermenter l aspet che i 4 joufs entourn l Sela y i joufs de Arparora y de Fauzares fova y é i trois prinzipai de comunicazion anter les valedes ladines. Messessa enuncheltant n fodom o n ampezan che abiteia a Bulsan paié doi iadesc n daz per ruvé ta Fodom o via en Ampez? O un dla Val Badia messei fé la roda a Toblach per ruvé via Cortina de Ampez, sce al ne vuel nia paié n daz.  Una na cossa él saré ju valch streda al trafich lede da na pert fora, na autra cossa él mete a paiament  les soules arteries prinzipales de moviment anter les vals ladines. L efet psicologich dastramp negatif ne é nia da sotvaluté. Liams personai y de partegnuda, liams economics: artejans ladins che roda da val a val a laoré, fornidours per l setour turistich che vegn dantaldut tla Val Badia da sud, giatassa n bel gran enciamp tles stanges che Mussner vuel mete su.

Enfin a ciamò ne àn audí degunes protestes ofiziales contra i plans de F. Mussner, nience da valch union di ladins, p.ej. da la Union Generela, che ne pò nia cialé pro desche vigni valeda ladina vegn scluta ju con na stangia da la valeda vejina.

L fascism á spidicé la Ladinia anter l 1923 al 1927. Tré su confins nuefs sun i joufs deida renforzé chesta tripartizion.

Sce al essa n iade da vegnì trat ite na transiadura, na sort de daz, spo ne pò i ladins te degun caje vegnì sotmetus a na tel grovaria nia-azetabla. Scenò auter  messéssen pensé a fé tuniei de coliament anter les valedes n pue plu albas di joufs.

Reba y dovia l Sela, l cuer dla Ladinia. 

 
 
 Siour Fonjo Clara: i joufs lieia les valedes
 Smendrì l trafich sun i joufs
 Joufs entourn l Sela: ostiers scetics
 Scluje i joufs entourn l Sela: Fodom dij nò
 Stude sun la fatibelté de scluje l jouf de Frera

 
 

 

 







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1092