100 agn Union Ladina: pruma manifestazion
Data: 07 July 2005 da les 08:35:52
Tema: Manifestazions


 

La marcia sun la "Strada de la Vëna"

en domenia ai 10 de messel da Col Santa Lizia al Ciastel de Andrac - Mostra "Fodom dal aut"

Ciastel de Andrac te FodomLa marcia sun la "Strada de la Vëna" é la pruma manifestazion metuda a jì en ocajion di festejamenc di 100 agn dla union di ladins. La "Strada de la Vëna" fova la vedla streda sun chela che al vegniva mené l fer che i minadours ciavova fora dles mineores dl Fursil, sot al mont Poure. Chest fer, dret apriejé ti agn de maiour produzion entourn ai secui XV y XVI, vegniva porté ti fourns dl Ciastel d'Andrac y tles vals entournvia olàche al deventova adenfora ermes venudes sot a la merscia dl agnel, simbol dl Vescul de Persenon. N troi storich, dant a n valgugn agn derturé dai verdabosc, adum a les vedles entredes dles mineores.

Ruina dl Ciastel de Andrac

 



Strada de la VënaDa les 9 vegniràl dit la santa messa tla gliejia da Col. La marcia piarà via enveze da mesa les diesc dant a la Cèsa de Jan, senta dl nuef istitut cultural ladin. N edifize vedl, fat su tl 1612, che é sté per agn  la senta dla aministrazion dles mineores dl Fursil. An ruva al ciastel d'Andrac, tl comun da Fodom, olàche an podarà vegnì acompagnés a vijité cie che al resta de n simbol dla val, da puech comedé fora da la Souraintendenza a les Beles Ertes de Aunejia. Daite vegniràl metù a jì na mostra intitoleda "Fodom dal aut" con fotografies dles frazions da Fodom toutes ju dal parapent da Franco Soratroi ( Rechia).  La marcia é daverta a duc chi che à pascion de jì a pé su per mont. Sun streda giataràn posc’ olache an podarà se beive valch.  Sot al tendon metù su dant a la mont  de Ciastel enveze, podaràn marené y balé fina da seira. Per chi che à debujegn de jì derevers ja Col a se tò l auto, él vegnù prevedù ence n servisc de bus. Les iscrizions é davertes dal 1 de messel al Istitut Cultural Ladin Cesa de Jan, Via Villagrande 54, 32020 Col ( BL ),  telefon y fax 0437/720609  E-mail, istladncesadejan@libero.it, olàche an podarà avei ence deplù informazions. Les iscrizions vegn sclutes ju en domenia 10 de jugn da les 10 dantmesdì. Al é da paié 6 euro ( 4 per mutons enfin a 15 agn ) che tol ite: na recordanza dla manifestazion, valch da beive y da mangé sun troi y l bus per jì derevers a Col. Sot al tendon da les cater domesdì balarà l Grop de Bal da Fodom. Da mesa les cater vegniràl fat la premiazion. Da les does domesdì a mesa les cinch podaràn jì a vedei debant l ciastel y la mostra acompagnés da na guida.  L'organisazion met a cuer de se tò do guant y de se vestì ciauzés da jì sa mont  L temp mascim per ruvé la marcia é de 5 ores y mesa. L'organisazion se resserveia de mudé o fermé la manifestazion sce l temp o auter essa da mete en pericul la segureza. Ala ne tol su deguna responsabelté, ma informeia che al é vegnù stipulé na assegurazion per la responsabelté zivila. (ls)







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1072