Input: varianta de val ----> output: Ladin Standard
I Istituc Ladins é tl laoré fora massaries linguistiches nueves: coretours ortografics y adatadours morfologics, ence verscions Open-Source
Chisc dis él vegnú fora la verscion nueva di coretours ortografics dl Ladin Standard y dl Ladin fascian per Microsoft Office. Sen ésen ence tl laour de elaboré les verscions di coretours ortografics dl fascian, gherdeina, dl badiot y dl ladin standard te na verscion Open Source y l adatadour morfologich dl ladin fascian. Al se trata de massaries linguistiches scialdi d'utl per la comedura automatica, pensedes per les scoles, les aministrazions y i apascionés. Ma chest ne é nia dut: tost sarál dant man ence n adatadour morfologich per passé automaticamenter, entratant che an digiteia n test te na varieté de val, al Ladin Standard.
Do les verscions beta di coretours ortografics dl ladin fascian (merz 2003) y dl ladin standard (dezember 2003) sporj l Istitut Cultural Ladin does verscions nueves di coretours per Microsoft Office, da desçiarié gratis dal sit www.istladin.net. L coretour fascian é vegnú comedé y amplié aldò dles segnalazions di utilisadours y é en plu vegnú arichí con 50.000 mile formes nueves, ruvan a passa 500.000 endut. Al se trata de formes trates dai dizionars personalisés criés dal Ofize Linguistich y dal Comprensore Ladin de Fascia y de formes toutes su ti cialan tres al corpus aministratif y a n valgunes anedes dla Usc di Ladins.
A pér él vegnú mioré, comedé y atualisé l coretour dl ladin standard con l dizionar personalisé metù adum dai redadours dl sit internet de informazion noeles.net con l'enjonta dles formes di dizionars terminologics criés tl cheder dl projet SPELL-Tales. Al é vegnú enjonté 17.000 formes, arjonjan n total de soura 250.000 formes. L coretour dl Ladin Standard pò tamben vegnì desçiarié dal sit dl Istitut Ladin "Majon di Fascegn" * (liam atif) che sun l sit dl SPELL.
Trami i coretours pò ence vegní damanés do diretamenter al Istitut Ladin de Fascia y vegnì instalés con l aiut dl personal dl Istitut, sce al essa da ester valch problem.
L Istitut Cultural Ladin "Majon di Fascegn" deberieda al Istitut Ladin "Micurà de Rü" y con l sostegn tecnich-informatich dla dita Open Lab de Firenze é plu inant tl realisé per la fin de chest isté na seconda generazion de coretours ortografics per 3 varietés ladines (badiot, fascian y gherdeina), plu l ladin standard, che ne é nia plu liés a programs dla Microsoft. Al se trata de verscions Open Source, sistems daverc da giaté tla rei, per chi che an ne mess nia plu avei programs spezifics per i fé funzioné.
Y chest ne é nia ciamò dut: l Istitut "Majon di Fascegn" é bele tl laour de enjigné ca does d'autres massaries linguistiches che jirá ciamò plu de uega: adatadours morfologics per sauridé l scrive per ladin fascian y ladin standard sibe per laour che per pascion. Al se trata de n adatadour morfologich che dará l mued de passé "automaticamenter" da la varianta locala fasciana (cazet, brach, moenat) a la varianta fasciana standard, oben da la varianta standard de val (fascian standard, badiot de mesaval y gherdeina) al Ladin Standard entratant che an digiteia n test.
Coretour ortografich per MS-Word
Coretour Ortografich: co l adoré- Dizionar dl SPELL on-line
-
