Assessour ladin o assessour a la cultura gherdeina y badiota?
Data: 23 May 2005 da les 23:18:25
Tema: Ladin Standard


 

Na verité che và demé ben canche al é comot é fauza te sies fondamentes 

Les idees dl assessour F. Mussner é fauzes y á implicazions grieves per la Ladinia

N comentar de Erwin Valentini

L seminar de Cianacei sun i media ladins volova ester na ocajion per descore di problems dla comunicazion y informazion per ladin y per i ladins y i raprejentanc dla politica ne podova samben nia resté demez. Da cie che an à podù audì y lieje (ciala en particolar l articul publiché sun noeles.net ai 22 de mei, l'informazion se ghira ...) à F. Mussner endò n iade nuzé l’ocajion per dì de no al ladin scrit unifiché, che el y siei compagns dla SVP ladina seghita a definì y refudé sciche na "Kunstsprache".

 



Nia da nuef, ma una na virtù méssen ti lascé al assessour gherdeina, chela de ester cler y coerent; sia touta de posizion é daldut en linia con la politica y les dezijions dla jonta de Bulsan en cont de rejoneda, cultura y scola ladina. Nience siei argomenc contra l ladin standard é nuefs, ai someia a na giaculatoria lieta fora y "heruntergeleiert" da n breviar dla Partei.

Les idees dl assessour podessa vegnì toutes en conscidrazion o rebatudes sciche tantes d’autres, sce ales ne fossa nia en pert fauzes y ne essa nia implicazions grieves per la Ladinia. Sce Mussner rata che l ladin standard sie na "Kunstsprache" che ne ti plej a degugn y che demé i idioms (ciugn pa, chi de paisc, de val o de mesaval?) sie la "dreta esprescion de nosta identité", déssel podei l dì; vignun à l dert de avei sia minonga y de refudé, sce al miena, l ladin unifiché o magari ence l ladin tout court. Les convenzions internazionales sun i derc dl om ti reconesc a les mendranzes linguistiches l dert de adoré sie lingaz ma ales ne ti proibesc a degugn de arbandoné l lingaz dla oma sce al ne ti scusa nia plu. Ma la minonga de n grup o de n partit ne ti dà a chisc nia l dert de ti sforzé su ai autri sies verités tres decret. La dezijion de lascé pro demé l gherdeina y l badiot tla aministrazion publica scluj fora en pratica i ampezans, fodoms y fascians che viv y laora tla provinzia de Bulsan; sce chisc vuel benefizié dl ladin méssei adoré l badiot o gherdeina y renunzié a sie idiom original, chela "dreta esprescion de nosta identité", sciche al dij l assessour a la cultura ladina (en realté a la cultura gherdeina y badiota) de Bulsan. L ladin standard, che fova vegnù pensé ence sciche na soluzion a chesta sort de problems, é vegnù refudé ciuldì che al é "n mescedoz artifizial", n puech desche l ingleis ("degugn ne sà plu ciun che é l dret ingleis") rata Mussner; n maiour compliment ne éssel nia podù ti fé al ladin unifiché o LS! N ejempl plu democratich en cont de adoranza dl ladin vegn da la provinzia de Trent: chesta ne à degun problem a lascé valei l standard dlongia l fascian y a l adoré ence tla pratica

Duta la campagna contra la "Kunstsprache" ladina, sia natura y sia valuta soziolinguistica é baseda sun argomenc y vertoles ad hoc che ne sta nia empé sce an les met a la prova di fac. La fauzité de chesta campagna pò vegnì desmostreda, sciche al scriv l autour dl articul sun Internet, paridlan la funzion dl standard ladin con chela dla "Hochsprache" todescia. Sce Mussner miena che i dialec-idioms sie la soula dreta esprescion de nosta identité y che "n lingaz net, autentich, unfat per duc ne esist nia" (degugn ne à mai pretenù che l ladin unifiché o d’autri lingac naturai sie valch de tel!), a cie moda ne aplicheia pa nia sie partit chesta vijion al lingaz todesch de Sudtirol? Na teoria che va demé ben per na pert dla realté o canche ala fej comot é fauza te sies fondamentes.

Ma él pa veir che l "dret lingaz, chel tipich, é chel di pici mutons che rejona do natura l lingaz dla oma"? Chi mienen pa chilò per "pici mutons": chi de 2 agn, chi dla scolina o dla scola elementara? Sce an scouta su l rejoné de nosc mutons auden tost che sie ladin ne sona nia dagnora tant net y autentich che zachei nes conta dant; chest messessa l responsabel politich dles scoles ladines de Südtirol savei. Trueps de chisc pici bambins, dantaldut te Gherdeina ma nia demé ilò, à n pere o na oma nia ladins o magari genitours ladins che rejona con ei talian o todesch (donca ciun é pa l lingaz dla oma?), y l assessour conesc dessegur valch ladin che à messù s’emparé l "dret" ladin da gran ajache al ne l ova nia emparé sciche al toca da la oma. I mutons ne à samben deguna colpa, ma i stilisé sciche fontanes y modiei de bel ladin me per scialdi fora dla realté.

I media, végnel dit, dess adoré i idioms originars y tipics, l ladin che vegn rejoné da la jent y no na "Kunstsprache". A pert che degugn ne à mai pretenù de ti sforzé su a zachei l standard, tant tipics é pa chisc idioms tla pratica de vigni di? Nia cis da giut à Lois Trebo scrit n bel articul ola che al se baudia che les intervistes y autres formes spontanes, donca originares dla rejoneda che an pò audì o lieje ti media ladins é "n ladin massa bastert". I idioms sciche esprescion dl ladin net y tipich é aldidancuei n mit y na utopia ciamò plu grana che chela dl ladin standard. Dut chest Mussner messessa l savei per esperienza y per scienza y sce al ne l sà nia, àl demé bria de damané siei esperc, i medems che l istitut "Micurà de Rü" ova consulté denant che tò pert al projet SPELL. Ma l assessour gherdeina y si compagns de partit pèr che ne ae nia debujegn de conseis y seghita a se comporté sciche les trei scimies che ne veid nia y che ne aud nia. Con na desferenzia emportanta: ei, l’autorité, ne scouta nia chiec, ma decreteia dal aut ciun che é l dret ladin y ciun che pò vegnì adoré te scola, te ofize, te tribunal, sun placac y comunicazions per la jent.

 

 
D'autri articui comparus sun noeles.net sun la medema tematica:
 

 







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1038