Iö arate che la SVP de Gherdëina, dandadüt chëla de Urtijëi, ne ti ais nia ma le spiso ai "Ladins" mo a düt ci che é ladin (y no gherdëina o badiot), le lingaz ladin, la Uniun di Ladins, la Usc di Ladins, i ladins de Suramunt, la cooperaziun interladina, le ladin dolomitan, etc.
Mo é Gherdëina ciamò na val ladina? Cësc istè m'ai tut la bria de cumpedé les bandieres ladines che fô metüdes fora sön stradun, da San Ciascian cina Urtijëi. Resultat: te vigni paisc badiot podôn odëi na bandiera ladina che ti dê le bëgnodü a chi che ruvâ adalerch. Te Gherdëina nen ai cumpedè üna; d'atres bandieres nen fôvel en grüm, dantadüt de chëles tirolejes. Na inrescida soziolinguistica à porater mostrè che le prinzip d'identificaziun primar te Gherdëina n'é nia la ladinité mo Tirol (todësch).
Va bun, vignun à sües minunghes y sü ideai, ci che me fej plö de morvöia é che la SVP dla Val Badia é deventada oramai la secunda usc dla SVP de Gherdëina, plö avisa dla seziun plö scraiona. chëla de Urtijëi. Por se profilé pèl che i badioc y maroi, ince persones conesciüdes sciöche ecuilibrades y de scentimënt, mëss smatè les usc plö strambes dla SVP "ladina" de Gherdëina. Na domanda: arati i candidac badioc in pectore de ester bogn de se la fà avarëi lascian jö la braia dan da chi che scraia cuntra vigni scomenciadiva che fej referimënt ala Ladinia? |
