benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lites comunales a San Martin de Tor: lista Ciampaní de Lungiarü
scrit ai 18 April 2005 da les 13:46:13 da noeles

Politica

"Per na aministrazion trasparenta y dlongia a la jent"

Lista "Ciampanì" da Lungiarü se prejenta - Meinalista é dr. Giovanni Mischí

La lista “Ciampanì” de Lungiarü, una dles 4 listes tl comun de San Martin de Tor y bele te comun tles ultimes legislatures, vuel laoré inant sot al moto „con la popolazion y per la popolazion“ y ciala da s’impegné per n'aministrazion trasparenta y dlongia la jent; la colaborazion anter ombolt, assessours y aconsiadours dess ester plu daverta y i barac d’informazion plu intensifs y regolars.

 

Dr. Giovanni Mischì, l meinalista dla lista "Ciampanì" a Lungiarü.

 

 

 

Les listes che essa interes de mete si candidac y sie program sun noeles.net é priedes de nes i ortié. La publicazion é debant.



 
Candidac
 
MISCHÌ Giovanni
CLARA Claudia
CLARA Hanspeter
Clara Martino
CLARA Roman
CLARA Valerio
CLARA Walter (Vi)
COSTA Klaus
COSTA Monica
DAPORTA Alma
DAPOZ Roberto
MASSA Luca
MISCHÌ Marino
MISCHÍ Wendelin
MOLING Nicolò
NAGLER Consolata
SCHANUNG Damiano
SORÀ Reinhold
 
Program dla lista da desçiarié ju
 
 
Nos volon defene l'autonomia di comuns y dles istituzions locales tl reconesciment y tl respet de nosta mendranza. Nos volon ence nes impegné per mantegnì n ecuiliber san anter i bujegns economics, soziai, culturai y dl ambient en armonia con les ativités economiches plu emportantes de nost comun: l artejanat, l turism, l laour da paur, l comerz y d'autri laours y servisc.
 
ECONOMIA
 
Turism
 
Nost comun - y enscì ence l paisc da Lungiarü - é a livel provinzial reconesciù sciche raion debl de strutures y chest nes dà de bones poscibeltés per ruvé permez a cerc finanziamenc. Chesta lista sostegn dutes les iniziatives y formes d’intervent orientedes a sostegnì y a promueve l'economia locala. Per la sajon da d'invern él da laoré fora deberieda n program che ti piete ai foresc’  valch emplù a na maniera che ai vegne con continuité. Les zones turistiches inserides tl plan urbanistich dess dé na picia sburla te chest vers y envié a ester plu creatifs ence tl setour dl turism y dla gastronomia. Na majera valorisazion merita ence l parch natural Pöz-Odles.
 
Artejanat
 
N sostegn particolar dess giaté l setour dl artejanat che costituesc encuei te nost comun la fontana de davagn de majera emportanza. En ocajion dl’ultima reelaborazion dl plan urbanistich él vegnù inserì anter „Ai Jus y Tlisöra“ na picia zona per aziendes da artejan con poscibelté de comerz. Nosta lista s’impegneia che al vegne sen fat l plan d’atuazion a na maniera che i interessés posse defata pié do l terac y fabriché. Al vegnirà spo ence cialé d’individué d’autri grunc per ti dé la poscibelté a artejans interessés da se lascé ju.
 
Operes publiches
 
Al resta dutaorela da sistemé valch toc de ruf con operes de protezion sciche ence da mioré stredes che conduj permez a valch luesc da paur. Nost impegn sarà te chest setour dantaldut chel da garantì la segureza tla viabelté (stredes y ponc). Chisc n valgugn laours che i nes tolon dant da porté inant :
 
  • I nes impegnon per la realisazion de n marciapé sun l toch de streda prov. da Ghestan enfin a dant scola, da la gliejia enchin a la Pension Alpi
  • I portaron ence inant l’idea da realisé n pont per passé via l ruf ite a Plan dla Siëia (chest jissa ben per chi che va a pe y per mené legnam).
  • I porton inant la proposta da comedé y slarié l troi da “Pre da Val” enchin a “Gherdëces”.
  •  Tl toch da pont daite al Türch enchin ite en „Chi Pinis“ él da mete su stanges per l’iluminazion publica
  • Sistemazion dl verzon de scolina y scola elementara da la pert dessot y defora (garantì na majera segureza y mete su n valgugn juesc). Defora da la scola déssel vegnì metù su na „Blinkanlage“ (implant sluminent) per archieté ju n puech i auti.
  • La outa dant la stala dl Bianco mess vegnì comededa, ala é massa te n iade y perchel pericolousa.
  • Da sistemé él ence l troi de cortina che roda encer gliejia via
  • Deslarié la streda prov. da Ties enfin a te paisc
  • Al é ence bel plan da pensé cie destinazion che an vuel ti dé a la streda de Pescol.
  • Mesuré fora la streda da Seres-Miscì y paié fora i grunc ai proprietars - i cialaron ence de chirì formes per valorisé les “viles” da paur, emblem de nost paisc
  • Al dess vegnì porvé da sciacaré con la gliejia per i compré ju l pre via da la zona sportiva per avei n post da realisé n dì valch infrastrutura d’interes publich.
  • Da porté inant él ence l projet dla numerazion zivica (denominazion dles stredes y numerazion di frabicac)
  • Sun la streda da Vì messel vegnì sistemé les cunetes massa sotes dlongia streda su.
Urbanistica
 
Al é da cialé che l svilup dl frabiché vae inant te na maniera organica y che l cheder urbanistich dl paisc ne vegne nia massa desfiguré. Per les families joenes él da crié poscibeltés da se lascé ju - ma al dess ence vegnì cialé che la cubatura esistenta vegne sfruteda y nia lasceda agn alalongia vueta. Miour revaluteda dess ence vegnì la cubatura vedla dl paisc - unfat sce ala se trata de ciases tl zenter o da na pert fora. I cialaron de fé l poscibel per evité la speculazion y la venuda de fabriches y terac a jent foresta.
 
Paurs y agricoltura
 
Ala va debujegn de chirì formes de colaborazion anter economia turistica y paurs. Sciche categoria plu debla de nost comun y paisc dess ence i paurs podei tò pert a certes ressurses dl'economia y vegnì integrés miec. Na prospetiva da sostegnì é chilò les iniziatives de agriturism che s'à ti ultims agn svilupé dret positivamenter.
 
CIAMP SOZIAL
 
Nosta lista se tol dant da daidé mioré y coordiné i servisc soziai che é bele tl raion comunal sciche ence da sostegnì chi che vegnirà istituis ti agn che vegn. La Lista fej ence la proposta da arbassé l'ICI sun la pruma ciasa.
 
La familia
 
I volon ti dé nost aiut y sostegn a les lies y a les unions che se cruzia dles families y dles persones che à plu debujegn. Dutes les families dess giaté les informazions che ales adora y chest te na maniera saurida y nia complicheda.
 

I joegn

I nes tolon dant de daidé les lies di joegn te sies ativités de formazion y de comunicazion, i cialaron di posc’ de laour dla valeda y di cuartiers soziai tl Comun. Per cie che reverda l’Union di joegn dl paisc chirironse na soluzion per che ei gaté n local funzional y adegué.

La jent de temp
 
Al dess gnì slarié fora l plu poscibel l'assistenza sozio-sanitara te ciasa. Chi che mess jì a vive te Ciasa de paussa à la rejon de vegnì tratés con amour y dignité, tl respet dles cosses privates y tl mantegniment dl liam con chi de familia.
 
La sanité
Ala va debujegn de n bon coordinament di servisc sanitars tla valeda y dl'assistenza sanitara te ciasa. Ence nos volon dé chilò nosc impegn.
 

La scola, la cultura y la religion

I volon mioré la scola con strutures modernes y con programs y strumenc adatés. Nost impegn sarà ence chel de daidé mantegnì y dé inant les carateristiches culturales, tegnì su l lingaz ladin sciche ence da mantegnì vives nostes usanzes y nostes tradizions.
L livel cultural mess vegnì renforzé: i reconescion l gran valour y i volon raforzé l impegn dles unions y istituzions  culturales, dl teater, dla mujiga, di cors, di joegn y dles biblioteches. I nes festidiaron ence da daidé la ploania per mantegnì les strutures sacrales con sie valour artistich y la calonia dl paisc. Ajache al n'é a Lungiarü ciamò degunes capeles, volonse sostegnì l'idea da nen fé su una a Tlisöra, su insom l troi dles stazions.
 

Sport y temp lede

Per che i sportifs posse se realisé y coltivé sia pascion tl sport él ti ultims agn vegnù realisé te nost paisc de plu infrastrutures sportives. Ti agn che vegn saràl dantaldut da cialé dla manutenzion y che ales posse vegnì adoredes y sfrutedes ben, ma da cialé él ence che i cosc’ ne vegne nia a pesé massa sun la coletivité.
 
Stimedes litadoures, stimés litadours, per che la lista “Ciampanì” posse jì inant con l’ ativité a ben de nost paisc y porté a bon fin i ponc de program che ala se tol dant, adórela Vosta creta. I Ves prion perchel de nes sostegnì. Dantperfora bel DILAN!

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.471 seconc