benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

“Prisma” la trasmiscion culturala de Radio Gherdeina rejona con ladins a Bulsan
scrit ai 16 April 2005 da les 21:29:51 da noeles

Cultura

Emparé dai ladins che viv foradecá

I microfons de Prisma con Egon Vinatzer storj pro tla Comunanza Ladina a Bulsan - La trasmiscion jirá en ona ai 20 d’auril da les 11 dantmesdì sun Radio Gherdeina

I 50 menuc de Prisma, na trasmiscion de Radio Gherdeina Dolomites meneda da Egon Vinatzer, reporta argomenc soziai sciche de cultura, atualité, ma ence de discuscion y de conscidrazion. Vinatzer à dagnora desmostré gran sensibelté ai problems y a la realté soziolinguistica y politica dla popolazion de mendranza ladina. La vijita de Radio Gherdeina tla senta dla Comunanza Ladina a Bulsan, sun envit dl president Ivan Lezuo, ti à dé la poscibelté a na raprejentanza di ladins che viv fora dles valedes ladines, de documenté publicamenter y de testemonié sies esperienzes.

 



En zacotanc viv bele da generazions y é cherscius su y viv ti raions de rejoneda todescia entourn Bulsan. La Comunanza é la union che tegn adum.  Entourn la meisa torona él da audì raprejentanc che à sies raijes da feter dutes les valedes ladines dolomitiches. Al se trata de Ivan Lezuo (Fodom), Leo Soraruf de Coluzzi (Fascia), Ida Miribung (Val Badia), Ingrid Runggaldier (Gherdeina), Franco Doné (Fodom) y Giovanni Moling (Val Badia).
Al vegnirà rejoné y responù sun argomentazions y domandes che reverda dl percie che tant de ladins é jus fora de sies valedes a sté, de sia integrazion dl mond linguistich todesch y  talian, la vejinanza y la esperienza de convivenza con les autres does etnies. N auter argoment che vegnirà traté sarà i contac che vegn ciamò mantegnus con les valedes de provegnenza y sun truepes d’autres chestions soziopolitiches.
La “Comunanza Ladina” y i ladins che viv foradecà ti ensegna ai ladins dles valedes ladines de tegnì plu adum y de se stimé y respeté zenza crié desferenzies de ciampanil anter valeda y valeda o anter idiom y idiom. “N Fascian ne é nia n ladin de secont o terz degré, ma n ladin, n ladin desche n ladin de Gherdeina o dla Val Badia. Al é ence fauz y dejeducatif rejoné de ladins talians o ladins todesc, nos conescion demé ladins – ladins”. N’afermazion sterscia y ferma de Lezuo y che vegnirà fora clera entant la trasmiscion.
Entratant chesta edizion de Prisma desmostrarà i ladins che viv  foradecà che an pò zenzauter mantegnì y curé les tradizions y la rejoneda dl’oma, ence sce an ne é nia plu da ciasa tla tera ladina, l liam con les raijes de identité é inant strent y vegn ciamò valorisé y respeté deplù.
“Prisma” la trasmiscion culturala de Radio Gherdeina Dolomites tla edizion dl mercui ai 20 de auril ti dedicarà 50 menuc a la storia y a la esperienza che ladins fej y à fat da do la vera a encueicondì ti mendri o majers luesc dla provinzia de Bulsan. “Ence sce nos ne vivon bele da generazions nia plu te nostes valedes de provegnenza, nes sentionse inant ladins, i mantegnon y i valorison nostes raijes y dantladut nosta cultura, nostes tradizions y nosta rejoneda unfat ben, sce nia deplù de chi che viv inant tla Ladinia”, chesta é la minonga dla Comunanza Ladina de Bulsan dant ai microfons de Prisma te na discuscion scialdi daverta y interessanta, olache i ladins dles valedes ladines pò ciamò emparé truep.

 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.368 seconc