"Svilupé y mantegní na vita dignitoula da vive tla comunité de paisc"
La lista "Al Plan" prejenteia si candidac y sie program - Fortunato Ferdigg, vedl secreter comunal, sie candidat a d'ombolt
Tl paisc de Mareo se prejenteiel chest iade does listes de zitadins, una de chestes é la lista zivica "AL PLAN" con Fortunato Ferdigg dantcá desche candidat da ombolt. Al é sté enfin a dant da puec agn secreter de comun de Mareo. Al é sen en pension y vuel tó ite l post de Albert Palfrader che ne candideia nia plu.
L candidat da ombolt, Fortunato Ferdigg, á la venta de na longia esperienza tl'ativité comunala.
Les listes che essa interes de mete si candidac y sie program sun noeles.net é priedes de nes i ortié. La publicazion é debant.
Lista zivica "Al Plan"
CERES ZITADINES Y CERS ZITADINS
Sen éla endò tant inant. Ai 8 de mei végnel lité danuef l Consei de Comun. La lista zivica AL PLAN se prejenteia endò ai litadours y spera ence en chest iade sun vost consens. Tla perioda d'enciaria passeda à i raprejentanc de nosta lista podù arjonje truep, dantaldut tl setour di laours publics desche ence dla sistemazion y abeliment de nost paisc.
Ma nos son ence coscienc che nia dut ne n'é ju a scusa y ch'al pò vegnì mioré valch.
A duc i aministradours y aconsiadours dla ultima perioda ti va nost dilan.
Nostes candidates y nosc candidac:
Fortunato Ferdigg - candidat da ombolt |
|
|
Marco Pizzinini |
Sonja Kanetscheider |
|
Paul Videsott |
Maurizio Kastlunger |
|
Tone Maneschg |
Cristian Agreiter |
|
Franz Kanetscheider |
Luca Complojer |
|
Franz Call |
Robert Obwegs |
|
Hanspeter Frenner
Erich Mutschlechner |
Flora Messner Weiss Inge Dejaco Ties |
|
Karin Oberbacher |
|
|
Georg Mutschlechner |
|
|
Paul Vallazza |
|
|
Walter Ties |
|
|
|
|
é enjignés da sourantò responsabelté tl'aministrazion de Comun y vuel mete da pert interesc personai tl interes general dla popolazion.
Nosta devisa é: "SVILUPÉ Y MANTEGNÌ NA VITA DIGNITOULA DA VIVE TLA COMUNITÉ DE PAISC"
Nost PROGRAM:
Nos volon:
crié n Comun plen de vita,
- olache la persona é tl zenter;
- olache ence joneza y eles é prontes da sourantò responsabelté y vegn trates ite tla formazion de nosta comunité;
- olache nos rejonon deberieda, tolon dezijions deberieda y les realison deberieda;
- olach'al dess vegnì eliminé melentenudes y desfidentes per evité stritaries.
Nos volon:
Na aministrazion,
- che sta tal servisc de duta la popolazion a na maniera efizienta, coreta y leala;
- che à temp per vigni zitadina y vigni zitadin;
- che i é dlongia ai zitadins (creazion de na plata Internet de Comun emplù a la plata de Comun - encontedes con la popolazion);
- che aministreia y adora i scioldi dles coutes con prudenza, trasparenza y cura.
Nos ston:
per la familia, che se merita la protezion particolara da pert dl'aministrazion publica.
Iniziatives y istituzions per les families (oma dal dì, scolines, plazes dles bleites) dess gnì sostegnudes y promovudes. Nos son per alesirazions de coutes giustes y giustificables per families con trueps mutons y con mender davagn.
Nosta solidarité:
é per la jent sozialmenter plu debla. Nos volon nes impegné che vignun posse vive te condizions umanamenter degnes. Unions che laora a ben dla jent sozialmenter plu debla y dla miseria dess gnì sovenzionedes y sostegnudes.
- Nos volon promueve iniziatives y istituzions a ben de jent plu vedla, per ch'ala posse vive autonomamenter ence tl'eté.
Nos ti don emportanza:
- a la conservazion, promozion y sostegn dla cultura ladina, dal lingaz y dla tradizion;
- a l'adoranza dl lingaz ladin, endlonch olach'ala va;
- che la vita culturala giate impulsc nuefs.
- Nos ne nes tiron nience zeruch dant a esigenzes de d'autres cultures y idees.
Nost dilan:
ti va a les truepes unions, assoziazions y consorc per sie impegn dejenteressé y prezious per nost paisc y per l servisc al proscim. Nos speron inant te na bona colaborazion con l Comun.
Nostes ispirazions y impegn:
- é da asseguré la lerch da vive y da mantegnì la natura desche ence
- da evité l sfrutament speculatif dal terac coltivé y dla contreda.
- Natura y contreda é na richeza che mess vegnì conserveda per nos y nosc mutons.
- Nos son per na revalutazion dl Parch Natural.
Sostegn particolar tres na promozion clera dles infrastrutures se merita i paurs, che dà n gran contribut per la cura y conservazion dla natura y contreda.
Nos volon nes festidié:
- per n paisc curé y net, olache ence l trafich dess vegnì regolé con sens. Sce nostes zitadines y zitadins se sta ben, spo se stàla ence con nosc sciors ben y ai vegnirà endò.
- La vita comunitara te paisc dess giaté impulsc nuefs.
- Miorament dl servisc de racoiuda dal refudam. Mete su chegadois per i cians.
A nos nes él cler:
- che na economia che funzioneia é la basa de vigni comunité;
- ch'an se sent veramenter da ciasa tl Comun demé sce al ti vegn pité a la popolazion dal post laour, segureza y svilup;
- che posc’ de laour segurs, lerch da vive, poscibeltés da se realisé per persones singules y grups, prestazions soziales asseguredes te n ambient intat à plu emportanza che mai denant
perchel
nes donse da fé per n svilup ecologich, san, economich, competitif y orienté al davegnì de duc i eserzizes, tamben tl turism, tl artejanat, tl'agricoltura co tl setour dai servisc.
Enciaries de laour dal Comun dess, tant inant ch'ala va, i vegnì dedes a aziendes dl post.
Nos nes aodon:
- na mioura colaborazion anter i setours economics desvalifs y les aziendes anter chisc, ciuldì che chest contribuesc al progres dl'economia y deida pro al miorament dla cualité de vita tla comunité.
Nost impegn é ence per:
- duc chi joegn, families joenes y ence persones soules, che à debujegn de na ciasa. Nos volon nes impegné y crié i presuposc’ per che chesta jent giate n daciasa
Nos dijon de sci:
- a na ativité dl fabriché coreta, urbanisticamenter a post, y che scona la natura y la contreda.
- Nos ne schivon degugn controi, per ester segurs che les abitazions alesiredes y convenzionedes sie a desposizion de chi che chier n cuatier tal Comun.
Nos dijon de NO:
- a vigni sort de speculazion tal fabriché.
Laours publics y investimenc: L program pò vegni mudé y enjonté a gauja de situazions y debujegns nuefs:
- porté a fin laours bele metus man (palestra) y mete man laours bele deliberés (sistemazion dla plaza dai auti do la Ciasa de Comun);
- miorament y asfaltazion de stredes y plazes tal y fora dal paisc - sistemazion dla streda per Pederü;
- ressanament dla scola mesana y sistemazion deforavia dla scolina;
- costruzion dla canalisazion despartida/ultim toch (La Bronta-Gran Pré)
- elaborazion de n stude sun la fatibelté y economizité de n implant de telesciaudament;
- realisazion de trois dla roda y de na pista dla luesa en acordanza con i proprietars di terac;
- miorament dl azes, realisazion de n marciapé y miorament dla iluminazion publica a Al Plan Dessora;
- realisazion de na fermeda dal bus con tet;
- porté inant l marciapé Al Plan-Gran Pré;
- destinazion nueva per la scola vedla y derturament dl paion dla mujiga (propostes da pert de unions y joegn);
- soluzion dl problem "nodadoia corida";
- compra, urbanisazion y assegnazion de terac da fabriché tai raions produtifs y d'espansion;
- atuazion dal plan regoladour nuef.
Per podei realisé chest program adum y per la popolazion, nes damanonse vosta creta.
