benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La pruma publicazion dl Istitut Ladin Cesa de Jan
scrit ai 11 April 2005 da les 21:59:37 da noeles

Cultura


L Istitut Ladin "Cesa de Jan" prejenteia sia pruma publicazion
 

Ai 16 de auril, da les 17.00 tl salf dles scoles vedles elementares a La Plie de Fodom - Autoura é Brigitte Rührlinger 

L Istitut Cultural Ladin Cesa de Jan prejentarà sia pruma publicazion de na morona che se clamarà "Ladins da Souramont." Al se trata dla stampa de na tesa de laurea de na studiousa todescia, Brigitte Rührlinger. La joena de Grünau im Almtal ( Auta Austria) s’à laureé te talian a l’université de Salzburg tl 2001 y ala à laoré per mete adum "l Atlant Linguistich dl ladin dolomitan y dialec vejins." La publicazion se clama "Il movimento neo ladino in provincia di Belluno" y coche an pò capì analiseiela sot trueps ponc de veduda, les motivazions soziales y culturales che à porté ti ultims agn ben 36 comuns dla provinzia de Belun a se declaré ladins.



La Rührlinger, con na archirida sun l ciamp fata ciamò tl 2000, recostruesc dutes les tapes de chest prozes de formazion dl moviment neo-ladin tla provinzia de Belun, ma souradut fotografeiela la situazion che an vivova tl Agordin, tl Ciadoura y tl Comelich dal pont de veduda de sentiment ladin, propi canche al jiva en doura la nueva lege nazionala sun les mendranzes. N moment zite, plen de vueia ladina che chersciova da dutes les pertes, de perplessités y de polemiches, olàche trueps se spetova de gran mudamenc. La archirida é vegnuda porteda inant con chestionars y intervistes y i resultac pòn lieje da la elaborazion grafica fata da la autoura. Tl liber pòn lieje ence na gran pert dles respostes dedes da les persones intervistedes, endut 92 tles zones dl Agordin, Ciadoura, Comelich y samben de Fodom Col y Ampez, che fej capì endertura i sentimenc plu desvalifs nascius entorun a la chestion neo-ladina tla provinzia de Belun. Ence sce la archirida mirova a capì l fenomen propi te chestes comunités che enfin a dant puec agn ne se essa mai pensé de se declaré ladines o scedenò vedova la chestion demé desche recriminazions de jent filo-austriacanta, l’autoura à volù intervisté ence jent da Fodom, Col y Ampez propi per avei n termen de paredl. L laour che é vegnù fora é de gran valour. N termometer scialdi cler dles desvalives fazedes dl sentiment ladin tla provinzia de Belun. La prejentazion vegnirà fata en sabeda 16 de auril, da les 5 domesdì tl salf dles vedles scoles elementares da Col. Al tolarà pert adum a l’autoura, ence la studiousa y storica prof. Luciana Palla, che se á festidié dla publicazion y l prof. Gabriele Iannaccaro. ( ls )


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.377 seconc