benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lites comunales a Bulsan: Dolores Dariz sun la lista Margherita
scrit ai 06 April 2005 da les 20:06:02 da noeles

Politica


Dolores Dariz sun la lista "Margherita" desche candidata ladina

La lista "LADINS" toma a Bulsan per gaujes organisatives - Dolores Dariz va sun la lista dl ombolt Salghetti, la "Margherita", desche candidata autonoma

Oramai é la situazion clera y la dezijion é touta: i ladins dl comun da Bulsan ne arà pro chestes lites comunales nia plu sia lista, sciche al é suzedù tles does legislatures da denant, ma ai arà sie raprejentant autonom tla lista “Margherita”, te chela dl ombolt Salghetti. L raprejentant di ladins resta inant Dolores Dariz, numer 4 tla lista Margherita. Ala laora pro la Provinzia y à esperienza.



Dariz s’à desmostré dassen ativa per i problems di ladins de Bulsan, souradut ti ela steda do con gran sacrifize y pazienza ala chestion dla ciasa per laoranc y studenc ladins che vegn da les valedes. Ala é ledia, da maridé, y ala s’en tol soura con gran pascion dla enciaria de raprejentanta che i ladins de Bulsan ti à sourandé bele dant da cinch agn. Na persona daverta, che deida ence trueps talians y todesc. I publicon na outa la letra che ela à mené ai ladins de Bulsan:

"Stimedes Ladines, Stimés Ladins, tl 2000 s’à prejenté la Lista LADINS a les lites comunales y i sun vegnuda liteda desche aconsiadessa tl Comun de Bulsan y nomineda Presidenta dla Consulta per i problems Ladins. Te Consei de Comun ai laoré per damané denominazions ladines, i é fat emendamenc y interogazions y i é fat n gran laour per avei na ciasa per laoranc y studenc che vegn ju da les valedes. La ciasa dess ester enjigneda per l proscim ann. En plu éi fat 23 intervenc te Consei, i é tout pert a 6 comiscions, i é scrit 17 articui ai foliec, i é tegní contac con i zitadins y i ti é dé respostes cleres y i sun steda bona da mete ite raprejentanc ladins te comitac desvalifs (Spert City - Museum Zivich y comités dles scolines). La Consulta per i Problems Ladins, strutura che met da jì manifestazions, convegns y autres ativités culturales, é vegnuda metuda su tl Comun de Bulsan tl 1990, en gaujion dla pruma legislatura con i Ladins raprejentés dal Moviment Politich LADINS. Desche aconsiadessa de Comun y Presidenta dla Consulta éi colaboré truep con la Comunanza Ladina a Bulsan che se festidieia dles ativités culturales di Ladins a Bulsan da 25 agn. Al n’é nia plu sté poscibel se prejenté a les proscimes lites comunales con la lista “Ladins”, perchel me candideii desche raprejentanta autonoma dla Lista Ladins con la Lista Margherita ai 8 de mei 2005. Al é dret important tegnì su l scagn ladin tl Comun da Bulsan per podei jì inant con l laour y garantì la prejenza di Ladins a Bulsan. I laoraré inant per i problems di Ladins, per na bona convivenza anter i trei grups, con l sostegn a les persones en dificolté y per n miour servisc publich. Preibel: “Dede la ousc a Dariz Dolores dla Lista Margherita, nr. 4”. Per informazions o sclarimenc podeise me contaté al nr. 339-2610909. De biei saluc y dilan a duc."

Dolores Dariz Dariz vuel prové n auter iade, ence sce ala sà che les dificoltés y l laour é tres majer. Ala é vegnuda envieda a sté endò sun lista, ajache degugn d’autri ne volova sourantò l’enciaria: no joegn, no vedli. La desfidenza tla politica é tant grana che trueps rata temp perdù se dé ju empera. Davagné davagna demé i assessours y i ombolc. Y chisc é oramai demé plu l frut de debatudes di partis, di plu stersc. Dariz se prejenteia endò per tegnì su i ladins tl comun de Bulsan, per garantì n dialogh anter ei, tres plu rie da animé. La jent vegn a conzert, a manifestazions ligherzines, ma ala mancia a cheles de carater sozio-politich, ajache al ne ti vegn nia plu dit la verité, al vegn demé plu rejoné de colaborazion - unfat - subordinazion, sce nò végnen ciastiés. Dariz à aposta lascé tomé la politica, ajache ala conesc oramai ben la situazion di ladins, che vegn da plu valedes, che rejona idioms desvalifs y che fej pert de plu partis. Perchel àla dantdadut chirì l dialogh, ence privatamenter. Ma sen ésen te na situazion, che sce an ne tegn nia adum, végnen sburlés sun na pert, bonamenter per tres. A Bulsan él ladins, y ence cotanc, ma ei é avilis, souradut i joegn che ne veid nia plu n davegnì y perchel se declareiei talians o todesc. Gran ora de tegnì adum y de fé endò politica. (uc)


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Lites comunales a Bulsan: Dolores Dariz sun la lista Margherita (ponc: 1)
da travers ai 08 April 2005 da les 00:01:14
(Infos sun l utilisadour | Ti mané n messaje privat)
Dolores é na persona scempla ma inteligenta che se à vadagné l respet di ladins, no demé de chi che viv a Bulsan. Na politica de laour y de fac concrec y no de ciacoles o de paruda per la televijion (sciche fej i assessours taiavetes dla domenia). Fòssei pu duc enscì nosc "omi" dla politica!


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.393 seconc