Selva: trei candidac da ombolt

Program dla lista "LADINS" - La Svp ti recorda ai paejans chi che comana a Bulsan

Ai prums de auril á la "Lista Ladins" prejenté tla ustaria de Val si candidac y sie program. Candidat da ombolt é Carlo Willeit. Meinalista é Claudia Bertuolo (dl Aaritz), riesc do végnel Eleonora Senoner Mussner (Lori) y Sabina Willeit, spo Paolo Bellemo, Gianpaolo Bonata, Peter Lardschneider, Dietrich Mussner (de Val), Flavio Mussner, Walter Ploner (de Fuloni), Hugo Senoner (de Dorives) y Ewald Senoner. L scherz con la "lista de paisc" dl ombolt Roland Demetz ne á nia renforzé la posizion di "Ladins", ma ala á sclarí les posizions.

Sciche Carlo Willeit dij, fóssel sté dastramp damat lascé tomé la lista "Ladins" a livel comunal, la pruma che á arjont  l scagn da ombolt per doi iadesc endolauter. Per chesta gauja se ál ence dé ca a sté a cef sciche candidat da ombolt. Al lascia daverta la poscibelté de colaborazion a do les lites. L grup Svp dl paisc á entratant lascé al savei ofizialmenter ai litadours che demé la lista "Svp" ciafia da arjonje zeche y da avei suzes tla zentrala a Bulsan, oláche la Svp comana, depierpul che les autres listes ne ruva nia soura l confin de comun fora, vuel dí sie rai de moviment politich é dassen restrent. Candidat a ombolt dla Svp é Diego Bernardi.

Les linges programatiches dla lista "LADINS" de Selva:

Operes - plu conzet y coordinament dles operes publiches-priorité a segureza y sanité-operes y mesures de gran prescia: zirolazion auti y persones anter Hotel Krone y furnadoia Ciampinoi - ressanament raions da eghes y sasc-  arbassament dl trafich y dla velozité.
Territore, economia - mesures concretes contra les speculazions y les megacostruzions - deplù sauridanzes per la 1. cesa y les pices aziendes- plu estetica y varenté l patrimone storich-cultural-natural.
Sanité - potenziament dles vijites spezialistiches y dla reabilitazion tl zenter de Urtijei - prum aiut tla valeda - personal cualifiché
Scola - flessibla y pluridirezionela, ma con integrazion saurida y degun peis en lu per i scolés - mantegniment de sia funzion de basa per la conservazion y l svilup dla rejoneda y cultura ladina.
Sport - modernisazion di stadions y bon coordinament a livel de valeda - indenité ai proprietars di grunc.
Joegn, eles, persones de temp - partezipazion a la vita soziala y a la aministrazion do a regoles y scomenciadives ledies sostegnudes publicamenter.
Sozieté - plu cultura, plu relazion, manco stress individual y coletif.
Aministrazion comunala - statut y regolamenc nuefs ciamò chest ann - formes nueves de informazion y colaborazion dla jent- aministrazion plu scempla, daverta y reidla con duc - degun peis fiscal en plu.
L program plu spezifich vegnirá prejenté al publich per temp dant les veles.