Feter degügn ladins ne laora pro l'Université Lëdia Balsan - Willeit se damana por le grup ladin öna dles döes vizepresidënzes sciöche preodü dal statut, atualmënter tuta ite da n todësch

Te na interogaziun al’Assessorat competënt à le vizepresidënt dl Consëi provinzial, Carlo Willeit, damanè co che l’organigram (posć de laûr) dl’Université Lëdia da Balsan è strotoré, tan de posć che è incö ocupà y tanć nia, y sciöche la repartiziun di posć danter i trëi grups ćiara concretamënter fora.

Söl retrat: la sënta dl'université tl zënter a Balsan.

Dala resposta rovada chisc dis tla Vizepresidënza ladina resultëiel chisc dać: tl’Université Lëdia da Balsan laora atualmënter te forma fissa 116 colaboradus/-ësses tl setur dl’aministraziun y i professurs tuć sö é 14. Aladô dl Statut dl’Université n’é l’assunziun de n professur nia liada ales normes dl proporz.

Tla planta organica dl’Université Lëdia da Balsan vëgnel al momënt ocupé 124 posć sön indöt 185 autorisà. Di 124 colaboradus/-ësses nen él 57 che laora tl’aministraziun y 67 tl setur academich. Di 124 dependënć è 116 tuć sö te forma fissa (a tëmp indeterminé), deperpo che 8 laora cun n contrat de laûr a tëmp determiné.

Ala fin dl ann resultâ 70 dependënć dl grup linguistich todësch (60,3%), 45 dl grup talian (38,8%) y ma 1 n dependënt dl grup ladin su (!). I posć de laûr tles posiziun dirigenziales dl’Université Lëdia da Balsan vëgn tuć ite da 16 todësc (69,6%) y da 7 talians (30,4%). Le grup ladin va chilò indô n iade fora a öt (!).

Ala fin dl ann resultâl fora dla planta organica indöt 6 colaboradus/-ësses todësc y 2 colaboradus/-ësses de lingaz talian.

Por mez jenà, insciö pon lì tla resposta a Willeit, èl preodü l’assunziun de ersonal nü, dantadöt de lingaz todësch.

Öna na vizepresidënza ti speta al grup etnich ladin

Nia ćiamò stlarida n’è la chestiun por ći che reverda la nomina dl Consëi d’aministraziun dl’Université Lëdia da Balsan. Bele da n valgügn mëisc ti à le rapresentant ladin Carlo Willeit ortié al Presidënt dl Consëi d’aministraziun dl’Université, Friedrich Schmidl, na lëtra, olache al osservëia che un di dui posć da vizepresidënt ti speta - söla basa dl statut dl’Université - al grup ladin. Willeit inviëia porchël le Presidënt Schmidl a sostituì le mëmber dl grup todësch (che è por le momënt Walter Stifter) cun n rapresentant ladin sciöche odü danfora dal Statut. Ara va inće chilò, isciö Willeit te süa nota scrita, dla rajun fondamentala dl grup linguistich ladin da avëi n so rapresentant, nia ma te consëi, mo inće tla junta de chësc organn.