L Telesguard passa da 6 menuc a 10 menuc al dí
Dal 29 de merz 2005 inant - Mudazion d'orar: la trasmiscion de atualité vegn trata dant de na ora da les 18.45 a les 17.45 - Repetizions plu tert
Les trasmiscions dla "Televisiun Rumantscha" (RTR) vegn aumentedes. Ales dura plu die y ará dal 29 de merz inant ence orars nuefs sun SF-DRS, l canal svizer che an veid ence tla provinzia de Bulsan. Chest vel dantaldut per la trasmiscion de atualité TELESGUARD che passa da 6 menuc a 10 menuc al dí. Medemamenter nuef, l Telesguard vegn trasmetú da sen inant ence de sabeda. Cie che dá atira a oredla y a uedl, ti cialan y ascutan su les trasmiscions rumances, é l lingaz net che al vegn rejoné tles trasmiscions, a desvalivanza da chilò, resultat de na cotant miour politica linguistica. La senta dla televijion Rumancia a Cuera.
N pue da moié é l orar dl telejornal che á messú vegní trat dant de n'ora da les 18.45 a les 18.45, puech dant ceina, n orar nia tant ideal, ma an rata de podei refé chest manco con les trasmiscions plu longes y atratives y al vegnirá trasmetú dal lunesc a la sabeda. Repetizions dl Telesguard végnel trasmetú sun SFInfo da les 18.30 a les 19.30 y da les 21.50.
La trasmiscion politich-culturala CUNTRASTS vegn trasmetuda de domenia da les 17.30 a les 18.00 y metuda endò en ona la sabeda da les 17.15 sun SF.
L radio trasmet atualmenter 14 ores al dí vegnirá ence trat ite te chesta restruturazion redazionala.
"I 6 menuc cuotidians de telejonal ne fova nia contentoui, ence sce l orar de trasmisciun da les 18.45 h fova ideal. L temp de 10 menuc, plu l’edizion suplementara dla sabeda dá l muet de fé de mioures trasmiscions con na miour strutura, na miour dramaturgia, d'autri ritms y n contegnú ciamò plu interessant. L "TELESGUARD deventa plu televisif, plu atratif y ciamò plu damprò dal publich", miena l manejadour dla Tv-Rumantscha, Mariano Tschuor.
Les prospetives de ampliament ne se ruva nia chilò. Al vegn ejaminé les poscibeltés de realisé a mesa veduda n program regional plu ampl sun n canal aposta dla televijion svizra. Ingrid Deltenre, diretoura dla SF DRS (Schweizer Fernsehen der Deutschen und Rätoromanischen Schweiz) dij che aladò de ela fóssel demé dret che "l cuart lingaz nazional" essa da garat n sie canal de radio y de televijion.
Liams d'interes:
