Consulta Ladina dl Comun de Bulsan: conzert di Acajo y Jandaniel & Band
scrit ai 10 March 2005 da les 15:10:05 da noeles |
|
N salf toch y plen per i Acajo y Jean Daniel & band
N stil musical internazional pò jí dret ben a una con l lingaz ladin - Bela la prejentazion de Rut Bernardi
L resson é sté dret bon; tant gran ne se l'essa nience i organisadours aspeté: l pice teater "Carambolage" a Bulsan fova plen, toch y plen enseira (09.03.05). Truep publich ladin da Bulsan y da les valedes ju, ma ence publich nia ladin é vegnú per l conzert de mujiga moderna ladina. Empruma á soné y cianté i Acajo, grup che dret trueps conesc nia demé tla Ladinia, ma ence tla provinzia y soura fora. Dedò à soné y cianté l grup Jean Daniel Granruaz & band. Ala se tratova de does direzions desvalives. Rock-pop con valch influenza jazz i Acajo, y jazz dl plu autentich, ma con influsc musicai desvalifs, dal pop al flamenco enchin al bossa nova per ruvé al rock, mo tres con la predominanza dl jazz.
Mujiga n'á nia n lingaz, ma l test dla mujiga á n lingaz. Y enscí éla ence pro l conzert, olache al é vegnù cianté truep per ladin (ma nia demé); ai á enscí mostré che n stil musical internazional pò dret ben jí a una con n lingaz de mendranza, y che adoré l ladin n’é nia provinzialism, ma segn tla vitalité culturala.
Bela la prejentazion de Rut Bernardi. Ala ti á recordé al publich - con gran aplaus - n fat che vegn massa gen desmentié, o miec nience tout en conscidrazion: Nos capion pu nosc vejins todesc y talians, al é ei a nia nes capì nos – y che al é enscí sie problem, nia l nost. Na logica che messessa vegnì aplicheda n pue plu sovenz.
L conzert é vegnù organisé da la Consulta per i problems ladins dl Comun da Bulsan. (mt).
09.03.2005: CIALA GALERIA DE FOTOS TL MENU A MANCIANCIA DL SIT
Foto 1:
L grup ”Acajo” con Raimond Irsara (chitara, Sax, ousc), Walti Moroder (clavier, chitara, ousc), Hansjörg Kostner (ousc, chitara), Viktor Canins (contrabas y ousc) y Georg Malfertheiner (bateria, congas, ousc).
Foto 2:
Jean Daniel Granruaz & band con Jean Daniel compagné da Alessandro Trebo (clavier), Phil Mer (bateria), Max Castlunger (percuscion) y Carmelo Leotta alias Leon Price (contrabas).
|
