benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Friul: truepa delujion per l sboz dl statut nuef
scrit ai 03 March 2005 da les 16:47:30 da noeles

Friul


Furlans ence tl statut nuef tla mesa-ombria
 

L Comité 482/99 ti á ortié na letra de protesta a duc i conseiers regionai 

Tl Friul cuejel l senn y la delujion dles Unions unides tl Comité 482/99 do l'aproazion dl sboz dl statut nuef da pert dl Consei dla Region Friul-Venezia-Giulia en chest meis de fauré. A l'elaborazion dl statut ova les unions lié empruma truepes aodanzes y speranzes y ova fat n grum de propostes dantfora. Dut parova da se ouje al miour dl 2003, encandenò resta dantaldut i furlans inant tla mesa-ombria legala. Ma zeche se muevel empò per merit dla lege statala. 


Tl statut végnel ben dant declamazions de "richeza culturala" y an rejona de "promozion dl lingaz furlan", ma dut adum él dut plu tourbl che cler. Al mancia les brances legales che d'autri statuc pieta normalmenter. L Comité 482/99 se ova damané che al vegnissa metú ite desche lingia de prinzip che duc i lingac dl Friul: l talian, l furlan, l sloven y l todesch, ae la medema dignité. Ma chest vegn araté massa problematich da la maioranza di conseiers regionai, davia che i Furlans ne é nia na mendranza tla region, ma la maioranza dla popolazion. An á demé lascé pro valch en plu per i slovens. L sboz ruva sen a Roma tl Parlament y mess passé does letures tl Parlament y tl Senat denant che jí en doura.  Ma zeche se muevel empò tl Friul y chel per merit dla lege 482/99 a chela che ence i Ladins dles Dolomites fej referiment per mete en pé n organism de coordinament anter les provinzies y regions. Do rata truep végnel fat te valch aministrazions comunales per introduje l furlan al medem livel, enscí tl capoluech Udin. Zeche végnel ence fat tles scoles. Les unions furlanes á ence arjont l'istituzion dl Arlef (Agjenzie regjional pe lenghe furlane) che á la funzion de mete en pé na politica linguistica unitara.
 
 
 
 
I reporton la letra de protesta dl Comité 482/99: ciuldí che i dijon de no a chest statut

Les unions y les lies che fej pert dl Comité 482/99 dij de nò al test dla proposta de lege revardenta l statut spezial dla Region Friul-Venezia-Giulia, deda pro ai 2 de fauré passé dal Consei Regional. Do ti avei cialé tres al test aprové, onse messú constaté con antium che nostes ghiranzes ne é nia vegnudes toutes su. La rescritura dl statut fossa steda na ocajion per l Friul-Venezia-Giulia de dé n dret vare inant belavisa per cie che reverda i derc linguistics, ma baudi ne él nia suzedú. Tl test dl statut dé pro él laite plu de n articul che vegn contesté da nosc assoziés, ma te nostes valutazions nes restrenjaronse al aspet di derc linguistics, davia che l Comité 482 se dá ju dantaldut con chisc.
Nos ti ovan bele prejenté entratant la campagna litala dant les lites regionales dl 2003 l document dal titul "Per i derc linguistics tl Friul Venezia Giulia" che i raprejentanc dla maioranza regionala da encuei ova garantí de sostegní. Te chest document fòvel laite ence ghiranzes menudes per cie che reverda la rescritura dl statut de autonomia. Dal test dé pro dal Consei Regional resulteiel endere sen che l sostegn empermetú entratant la campagna litala n'é defin nia vegnú respeté. I ne podon nia savaié de nia. Nos ti l recordaron ai zitadins te vigni ocajion che se pieta. I enjonton ence che nostes ghiranzes fova vegnudes sotrissedes ciamò n iade sibe entratant i laours dla Convenzion regionala che entratant la prozedura de aprovazion dl statut nuef.
Al roda n grum de declarazions ofiziales de esponenc dla maioranza atuala che rejona dles desvalives comunités de lingaz tl Friul Venezia Giulia desche element fondamental de nosta region y de sia autonomia. Sce an l aratessa veramenter n element fondamental messéssen perdret l afustié te vigni sezion dl statut, ma ciuna é pa la lerch che les desvalives comunités linguistiches tl Friul Venezia Giulia giata tl statut dé pro dal Consei Regional? Nience un n articul les contempleia! Al é cler: o che an ti dá al term "fondamental" na interpretazion dret desvaliva o che al é na clera descrepanza anter l dí y l fé.
I derc linguistics ne é nia, desche zacai volessa fé creie, n viz de puec scicons o zeche per l temp lede, ma i derc linguistics fej pert a titul plen di derc umans y desche tai déssei vegní reconescius y garantis. La violazion di derc linguistics ne á dessegur nia n resson mediatich tant ampl che les tortures o les violenzes de n'autra sort pò avei, ma ales romagn empò na violazion di derc umans.
I derc linguistics, desche i autri derc umans, é tamben individuai che coletifs. La Costituzion dla Republica taliana l testimonieia plenamenter (art. 2): "La Repubblica riconosce e garantisce i diritti inviolabili dell'uomo, sia come singolo sia nelle formazioni sociali ove si svolge la sua personalità, e richiede l'adempimento dei doveri inderogabili di solidarietà politica, economica e sociale."
Y, tl caje che zacai se desmentiassa, sclaresc la Costituzion taliana adenjonta che pro i derc umans audel ence i derc linguistics, (art. 6): "La Repubblica tutela con apposite norme le minoranze linguistiche."
Tl statut regional dé pro dal Consei, declareien depierpul che la Region "reconesc y garantesc" o ence demé "scona" i derc linguistics di zitadins furlans, slovens y todesc dl Friul-Venezia-Giulia? L coma 2 dl articul 5 dij demé che "La Region reconesc y scona con sies desposizions i derc de chi che aud pro la mendranza nazionala slovena y promuev tamben l lingaz furlan, l lingaz sloven y l lingaz todesch". Chesta formulazion raprejenteia n vare endaour sibe envers a la Costituzion dla Republica Taliana che a les leges statales 482/99 y 38/01. Dantaldut ne rejónen nia, a desvalivanza dla Costituzion, de derc referis a les mendranzes linguistiches, entenudes desche comunités. Al podessa parei che an l feje per i slovens, ma la formulazion é massa ambivalenta per ester veramenter na brancia. Deplen fora de entapa se stála con la formulaziun per i furlans y i todesc, per ei ne él no reconescimenc, no sconanzes, ma demé promozions, desche sce al se tratassa de marcianzia da vene. Y chest zenza conscidré che perdret ne pòn nience rejoné de furlans y de todesc per l scempl fat che tl statut ne eisteiei nia: an rejona ben de lingaz furlan y de lingaz todesch, ma zenza che al vegne fat n referiment a les comunités che rejona chest lingaz. Per i furlans y i todesc ne esisteiel enscí nia derc individuai y true demanco coletifs.
Do avei dit chest méssen atira enjonté n'autra consciderazion per cie che reverda l tratament desvalif anter i slovens da una na pert y i furlans y i todesc da l'autra pert. Lascion n iade da na pert l significat dl term "nazional" che trueps confon dutaorela con "statal". Al va de uega recordé che degugn ne á trat su la chestion entratant la vijita te nosta region di delegac dl Comité european enciarié da verifiché l'aplicazion dla "Convezion cheder per la sconanza dles mendranzes nazionales". L Comité european che se dá ju con "mendranzes nazionales" á enconté i raprejentanc furlans, slovens y todesc zenza ne fé deguna desferenza, a Triest endere en él dutaorela de chi che fej chestes desferenzes o messonse ti dí discriminazions? Al se trata de desferenzes de cheles che an ne afustieia y ne giata degunes giustificazions no tla Costituzion Taliana, no tla lege statala 482/99. Te chest cheder ne muda nia l fat che la comunité slovena giaud de na lege de sconanza per sie cont (la 38/01), ence ciuldiche te chesta lege rejónen de comunité de lingaz y nia nazionala. Ciunes é pa perdret spo les rejons de chesta distinzion? A chi ti éla pa d'utl? Nos podon demé dí a chi che ala ne ti é nia d'utl: ai furlans, ai todesc y ai slovens.
Sce an messova bele fé inovazions envers a la lege 482/99, y nia juvers, éssen podú fé referiment al romanés, lingaz di rom y di sinti, comunité tamben dant man tla region da trueps secui. Al fossa sté na desmostrazion de gran democrazia y de daurida recordé chesta componenta regionala. L Comité 482 ne ova nia porté dant chesta ghiranza y perchel perionse pordenanza, ma do l mote ne se á nience degugn tla Region fat n pensier.
Per dutes chestes gaujes dijonse de nò a chest statut regional y per dutes chestes gaujes combateronse a na moda che l test vegne comedé tla senta parlamentara. Per dutes chestes gaujes damanaronse al Comité consultif european per la "Convenzion cheder sun la sconanza dles mendranzes nazionales" de tegní cont ence de chestes obiezions canche al met ju sia relazion sun l'aplicazion dla Convenzion sun l teritore dl Stat talian.
 
 
A la protesta ne végnel lié deguna speranza che l Consei Regional tole derevers sia dezijion, ma an spera plulere che l statut ne passe nia tl Parlament a Roma y che dut vegne sburlé inant a do les proscimes lites regionales che podessa ofrí n cheder plu empermetoul  de retratazion. Ence a livel europeich fajarán prescion.
 
Les unions y les lies firmatares:
 
Associazione "Ad Undecimum";
Associazione "Beneske korenine";
Associazione "Don Eugenio Blanchini".
Associazione "FaF - Fantats Furlans";
Associazione "Glesie Furlane";
Associazione "La Grame";
Associazione "La Siele";
Associazione "Matajur";
Associazione "S. Pietro" (Tarcento);
Associazione "Vita 2000";
Associazione "'Zuf de Zur";
Associazione culturale "Colonos";
Associazione culturale "El Tomât";
Associazione culturale "Guido da Variano";
Associazione culturale "Pionîrs";
Associazione culturale "Rozajanski Dum";
Associazione culturale slovena "Stella alpina-Planika";
Associazione e redazione "La Patrie dal Friûl";
Associazione e redazione "Novi Matajur";
Circolo Culturale "G. Unfer" - Timau;
Circolo Culturale Saurano "F. Schneider";
Cooperativa di servizi linguistici "Serling";
Cooperative di Informazion Furlane - Radio Onde Furlane;
Istitût Ladin-Furlan "Pre Checo Placerean";
Istituto "Achille Tellini";

 
Liams emparentés
· Deplú sun l tema Friul
· Chier te noeles


L articul plu liet te chest tema Friul:
Fieste Ladina y IV Colloquium Retoromanistich: program


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.381 seconc