benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Enaudazion dl Istitut Ladin Cesa de Jan a Col Santa Lizia
scrit ai 21 February 2005 da les 13:55:55 da noeles

Cultura


"I Ladins dl Sela mess se costituí istituzionalmenter"

Enier, 20 de fauré 2005, él vegnú daurí ofizialmenter a Col de Santa Lizia l Istitut Ladin "Cesa de Jan" - Les paroles dl ombolt Paolo Frena 

Na gaujion de festa per les trei comunités ladines ex-asburgiches tla provinzia de Belun per cheles che al se concretiseia encuei finalmenter n some,  n some che é deventé realté per merit dla generosité y dla desponibelté di comuns de Ampez y de Fodom, che á sostegnú zenza pesimé la picera comunité de Col a na vida che ala deventassa senta de chest  Istitut Ladin dret important.



I volesse recordé l gran laour de valuta porté inant da la Consulta di trei comuns y da les trei Unions di Ladins per ruvé a chest travert. Dilan a duc chi che á laoré y nes é stés permez sun chest troi: al comun d'Ampez y dantfora al vize-ombolt Bruno Dimai deleghé per la chestion ladina, al president dla Union di Ladins d'Ampez Siro Bigontina che ne se á mai stancé de sostegní la gauja ladina y é perchel n pont de referiment per nos duc, dilan a l'aministrazion comunala de Fodom con l vedl ombolt Ugo Ruaz y a chela de encuei con l ombolt Gianni Pezzei y a les respetives Unions di Ladins che á dagnora daidé pera per arjone chest prum resultat. Ai amisc ampezans y fodoms vuei ti dí che Col fajará dut cie che al é meso per ti garantí n servisc endretura. Al é ence dret recordé l gran laour porté inant da l'Union di Ladins da Col y particolamenter al intern dla Consulta ladina di trei comuns. N dilan a duc chi che á daidé finanziaramenter per derturé en pert chest fabricat che albergiará l Istitut, dantfora a la Soruaintendenza ai Bens Architetonics dl Venet, a la Region Venet con la lege 2 revardenta i zenters storics mendri, a la Fondazion Cariverona y al Consorz Bim dl flum Plef/Piave. N dilan a la direzion di laours con a cef l arch. Marino Baldin encuei anter nos y a la impreisa de costruzions De Cian Albino per avei realisé l derturament. N dilan de cuer ence a les Comunités da mont Agordina y Valboite y ai respetifs presidenc. Te mia enciaria desche ombolt volessi ence ti dí dilan de cuer a la jonta comunala y ai aconsiadours de  nost comun, ence a chi che ne cherdova y ne crei dutaorela nia a l'importanza de chest servisc per nostes trei comunités. N dilan ence a nosc empliés de comun y chilò vuei sotlinié les bries dl tecnich d'ofize Defanti Bernardi per sia spraiza te chesta desche ence te d'autres ocajions.

Encuei ves damani endere de ves tó n pue dlaorela, ciuldiche i volesse tó l'ocajion dla prejenza de tant de autorités, ma en particolar di trei presidenc dles provinzies (Reolon de Belun, Dellai de Trent y Durnwalder de Bulsan, ndr),  per sotrissé en valgunes problematiches a cheles che l davegní de nosta comunité ladina é clermenter lié. Al é ben veir che les trei provinzies raprejentedes encuei a d'aut livel, é tl laoré dassen per giaté les sinergies per manejé en valgunes ativités, en particolar la viabelté y i coliamenc, la formazion universitara, la Euregio, l turism y les infrastrutures revardentes  y d'autri problems zenzauter importanc, ma nos ladins ex-asburgics, damanon che an mete averda a nos y che an ascoute su n argoment tamben important che é la sconanza de nosta identité, de nosta arpejon culturala, de nosc valours a chi che i ne volon nia renunzié y per chi che i damanon che an se dae arta, davia che i son convencius che chest é n valour en plu, dret significatif per dut l teritore dles respetives provinzies.
La chestion di Ladins dl Sela a chela che i feje referiment á raijes dret sotes y é carateriseda da na schira de revendicazions politiches y aministratives. L raion ladin con populazion de lingaz de mendranza ne á mai costituí n zenter cultural y politich-aministratif autonom. La situazion s'á pioré de cotant do l spidiciament dl raion ladin sun trei provinzies desvalives con degrés de sconanza desvalifs entratant l temp fascist y l destach definitif de Ampez, Fodom y Col da la diozeja de Persenon pro chela che l raion audiva enfin al 1964. An mess conesce la storia per capí i drec contegnus de nostes revendicazions, zenza ne ti tó nia a degugn. Sen endere se podéssel pa ben mudé valch.
I temps é madurs per nes abiné entourn meisa y capí cie streda tó, ence con l'indicazion dles disposizions nueves, cis la lege 482/99 che nes pieta poscibeltés concretes. I feje dantaldut referiment al art. 3 dla lege nomineda che veid dantfora la costituzion de organisms de coordinament souraprovinziai che i enc locai interessés á la facolté de reconesce. La convinzion che chesta sie na streda che an dess varié tles formes che i dezidaron deberieda, oresc dal fat che da trueps agn ne á chestes comunités nia abú l meso de se confronté con en valgugn temesc strategics de sia storia, de sia cultura o ciuldì pa nia de sia economia. Do l spidiciament teritorial sun trei provinzies desvalives é judes mancia cheles relazions istituzionales fondamentales per la souravivenza de nosta cultura ladina. Al vuel ester na colaborazion sterscia, ma dantaldut na union istituzionala desche les normes en doura (lege 482/99, ndr) veid dantfora per conduje inant nostes istanzes y nosc projec che ne messará nia demé scluje ite l aspet cultural, ma ence valch aspet economich  desche les strutures de coliament, l'istruzion y la formazion y l ambient. I dije chest davia che ie rate che al é gnú l'ora che i Ladins dl Sela/dles Dolomites se costituesce  formalmenter dal pont de veduda istituzional, se nuzan de chesta poscibelté concreta y che ai vegne reconescius a livel local, provinzial y regional, ti garantian la souravivenza. Da massa trueps agn pationse i danns che chesta sanisc comporta per nosta cultura y nosta identité. L temp passa y desche nos duc savon podéssen ence arjonje n pont da oláche an ne pò nia plu dé outa. Daviadechel ne podonse avei plu degunes pesimes.
Mie some, do l'enaudazion dl Istitut Cultural encuei, é de podei mete adum defata anter i 18 comuns ladins tl raion selan, na entenuda programatica raionala che se dae ju con l'istruzion y la formazion, l ambient y l'agricoltura, la planificazion dl teritore, zenza se desmentié che dal pont de veduda cultural vál debujegn de reconesce na funzion sterscia a l'Union Generela di Ladins dles Dolomites che laora da trueps agn per tegní vif l sentiment ladin te chestes nostes vals. I vue ence tó l'ocajion de  ti aodé y n laour enredoul y saren al Consei diretif nuef dla Generela con a cef Michil Costa.
L'aodanza é chela che al nes garete de uní nostes forzes entourn a n projet comun y trasversal che ti dae flé y speranza ence a les generazions joenes, che nos minon che al ti sie dut unfat, ma che á debujegn de avei valours autentics de referiment. Nos ladins son usés a combate con pazienza y truepa determinazion per nes fé avalei nosc derc tl respet dles leges y dles istituzions, ence ti temps dla globalisazion oláche la revendicazion de cerc valours pèr che ne ae plu deguna logica. Al se trata donca de ti dé continuité a chesta arpejon de valours de nosta cultura, investian dantaldut tles generazions joenes.  I ne podon nia nes recordé demé di Ladins entratant les campagnes litales per rablé adum valch ousc. I Ladins vuel avei na sia lerch y sia dignité y ester raprejentés tles aministrazions a vigni livel per vedei damprò tant che an fej efetivametner per chesta gauja.
I ne volon nia plu vegní coienés y strumentalisés, da degugn. I volon en plu sotrissé - desche i on bele fat plu outes - che "ester Ladins" é per nos na caraterisazion dret sterscia de nostes comunités dal pont de veduda antropologich a d'enjonta de chel linguistich. Chest per cialé de ti splié ai trueps "neo-ladins" tla provinzia de Belun che nosta storia é desvaliva y i ne volon nia che ala vegne omologheda a vigni priesc, davia che l ester autramenter dess vegní entenú desche richeza y daviadechel audela de vegní conserveda y zidleda con truep festide y poura y con les mesures che va de uega.
Se daurí y laoré deberieda con duc tla convinzion che chest dí dess romagne tl record de duc nos desche na merscia de na raida devers n miour davegní dla populazion ladina.

Paolo Frena, ombolt de Col de Santa Lizia.

Dé arta (gherdeina) = sporje atezion, mete averda


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 3
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Enaudazion dl Istitut Ladin Cesa de Jan a Col Santa Lizia (ponc: 1)
da travers ai 21 February 2005 da les 14:12:36
(Infos sun l utilisadour | Ti mané n messaje privat)
Can audiaronse pa n tel discurs da nosc ombolc superladins de Badia y Gherdeina?



Re: Enaudazion dl Istitut Ladin Cesa de Jan a Col Santa Lizia (ponc: 1)
da Jepele ai 21 February 2005 da les 14:37:08
(Infos sun l utilisadour | Ti mané n messaje privat)
Belavisa chel volovi ence ie damané. Podessais vos ves imaginé che Mussner fajessa de tel declarazions? ....


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.428 seconc