La Generela se organiseia: Ofize de presidenza, Consei diretif y diretour 

Tres chesta reorganisazion vuelen ester plu efetifs y organisés miec per les endesfides dl davegní - Intendenzes y Istituc Ladins pò ortié si raprejentanc tl Consei diretif

L statut nuef dé pro en sabeda, ai 12 de fauré, y paciré dant dal notar, comporta bendebot de restruturazion tla vita dla Union. N valgugn organs y enciaries nueves al intern dla Generela dess la fé plu gaierda y plu efetiva: dlongia i organs y les enciaries tradizionales, l'Assemblea, l Consei diretif, l President y i revisours di conc, veid l statuf nuef dantfora 2 vize-presidenc, n Ofize de Presidenza y l'enciaria de n diretour.

L president nuef dla Generela, Michil Costa.

Dl Consei diretif fej pert inant respetivamenter 2 raprejentanc dles 5 Unions di Ladins fondadesses (Gherdeina, Badia, Fascia, Ampez y Fodom). Con l statut nuef ti végnel sen ence daurí  l usc a n raprejentant dla Intendenza a les scoles ladines de Bulsan y dla sourastanza dles scoles de Fascia desche ence a n raprejentant dl Istitut Ladin Micurá de Rü, Majon di Fascegn y Cesa de Jan, sce chestes istituzions vuel. Sie raprejentant ará dert de parola, ma nia nia de ousc. Dert de ousc ará endere l president onorar che pò tó pert al Consei diretif che resta en ciaria 3 agn alalongia. Enfin a sen á la Generela un n president onorar, Hilda Pizzinini. Te sia pruma senteda litará l Consei diretif i 2 vize-presidenc che ti stará permez al president, forman adum al president  l Ofize de Presidenza. Al Consei diretif ti spétel spo de lité l diretour dla Union Generela con n temp de enciaria de 3 agn che pò vegní arlongé, na sort de Secreter general do l model dla "Lia Rumancia" ti Grijons. L diretour ne á degun dert de ousc tl Consei diretif, ma al é el che prejenteia i programs de laour y che traponará les dezijions dl Consei diretif tla pratica.

Dlongia l'organisazion prinzipala é diretamenter  liés tres comités de gestion metus da la Generela la Usc di Ladins (stampa)  y l Ofize Linguistich che conduj inant l laour de elaborazion dl lingaz ladin unitar scrit, l ladin standard.