Union Generela di Ladins: Consei nuef en pé
scrit ai 13 February 2005 da les 22:58:34 da noeles |
|
Michil Costa sourantol l temon dla Generela
Per trueps na plata blancia - Eniann végnel festejé 100 Union Ladina, na unité che mess vegní tiesciuda inant - Nuef: l'enciaria da diretour
 En sabeda, ai 12 de fauré, él vegnú lité a Urtijei l Consei nuef dla Generela. Chisc i candidac che é ruvés ite: per Fascia, Tone Pollam y Riccardo Zanoner, per Ampez Siro Bigontina y Elsa Zardini, per la Val Badia, Werner Pescosta y Michela Vittur, per Gherdeina, Egon Vinatzer y Manuela Piazza, per Fodom Cristina Lezuo y Manuela Ladurner. L president nuef é Michil Costa, ostier dl Hotel La Perla, da Corvara. Con l'aprovazion da pert dl Consei dl statut nuef s'á sclut ju l ann de presidenza de Nani Pellegrini y l laour dl ofize de presidenza che ova enjigné ca la restruturazion dla Generela, elaboran l statut nuef. Foto: la meisa de presidenza dla Generela, secont da mandreta, Michil Costa.
Nani Pellegrini á dampertfora dit che al ne volova nia plu candidé. Al ne ova nia mancé contrarietés da mete ju l statut. Degugn fora de Michil Costa s'á prejenté y s'á declaré enjigné a sourantó l'enciaria da president. En pratica fova l'enciaria organiseda dantfora, dantaldut per interes dla presidenta onorara Hilda Pizzinini y de valch member dla Uniun Ladins Val Badia, che á chirí l candidat da president tla persona de Michil Costa. Aprové él ence vegnú l statut nuef che vegnirà, aldò dles paroles dl president nuef, respeté enfin ti particolars.
Te sia pruma senteda litará l Consei nuef te sie grem 2 vize-presidenc y l'ofize de presidenza aldò dl statut nuef, nueva la figura de n diretour. Entratant l'enconteda él vegnú prejenté en gran linies l program. Sen métel man la realté. Michil Costa sourantol da Nani Pellegrini n'enciaria nia saurida da conduje inant la Generela. La creta che an ti à dé, é steda feter unanima con 27 oujes. Eniann recórden 100 agn Union di Ladins y an é dant a tratatives politiches dret zities per realisé na colaborazion soura-provinziala y soura-regionala per tiesce inant l'unité ladina tres la lege 482/99. Michil Costa é conesciú desche ostier y dantaldut desche organisadour dla Maratona dles Dolomites, ma ti ultims temps ence per sia sensibelté a problematiches ladines. Hilda Pizzinini é steda bona da l convence. Ai é vegnus deberieda y la contenteza do la lita fova da vedei. Per la majera pert é Michil Costa endere empò dutaorela na plata blancia. An sá puech de sie orientament y de sies intenzions. Sia "cariera" ne á nia metú man te na Union di Ladins. Ma la vueia y la motivazion de s'engajé ne ti fala nia.
|
