La desferenzia ne podessa nia ester plu scraienta 

L Govern Basch spen milions per slarié l basch ti media moderns: foliec, tv y internet

La desferenzia ne podessa nia ester plu scraienta. L assessorat a la cultura tla provinzia de Bulsan á stanzié tl plan de finanziament a la cultura ladina per l ann 2005 na megra soma de 52.000 euro ai media sun entourn 830 mile de euro a desposizion, alencontra 300.000 per guanc da zacan y aparatures. Ti Paisc Bascs se astílen autramenter, davia che an sá dret ben che i media raprejenteia un di majers portadours de lingaz vif tla vita da vigni dí per na comunité,  di per di, tresfora. L lingaz che vegn dé tres i media é valch de vivent, valch che se renoveia demeztroi, donca él da araté un di debujegns primars y essenziai. Ma tles Dolomites ne onse ciamò deguna politica linguistica, unitara, clera y finaliseda. 

La partizion de politica linguistica dl Govern basch à finanzié tl  2004 na bela cumpeida de iniziatives che se tol dant la promozion y la valorizazion dl euskara, l lingaz basch, tl ciamp di media. Anter les 600 ativités che a à giaté n sostegn publich sautel a uedl i 100 projec per deslargé les tecnologies nueves tl lingaz basch (900.000 euro), i 82 projec per les impreises che adora l basch (961.000 euro) y i 100 projec per i media tl lingaz basch che giata 3.800.000 euro. L Govern basch finanzeia en plu la ETB1, la televijion publica regionala che trasmet demé tl lingaz basch.

Informazions sourantoutes dal sit furlan www.lenghe.net .