Agnul di Spere poet e scritôr nus à lassâts

Agnul M.Pitane, nassût a Sedean tal 1930, al jere ingignîr (al veve cuistade la lauree a la Normâl di Pise), poete, scritôr e tradutôr. Al à vût davuelt a dilunc la sô ativitât lavorative in Svuizare, tant di cuistâ la citadinance di chel Paîs. Al è stât chel ch’al à inviulât l’instituzion de Union dai Scritôrs Furlans (USF), diventant il prin dean de socie. Inmò, tai agns de sô presince in Svuizare al à invià une rieste di impuartants contats e rapuarts cui Ladins Rumantschs dal Cjanton Grison, sore il dut cui ambients leteraris. Di cheste sô preseôse ativitât o cjatin testemoneance tes “Letaris dal Lasimpòn”, une rubriche ch’e vignive publicade sul sfuei in marilenghe “Int Furlane”, di Etalrêl Pascul (agacìn), Tarcîs Venuti e pre Pieri Londar. Al veve colavorât cul svuizar rumantsch Werner Catrina te redazion dal impuartant saç “I Retoromani oggi: Grigioni, Dolomiti, Friuli”, publicât dal editôt svuizar Giampiero Casagrande, dulà che si cjate scrutinade e contade la situazion dai tre plui impuarts grops etno-lenghistics de “Grande Ladinie”, teorizade dal glotolig gurizan Graziadio Isai Ascoli (1829/1907).
 Agnul di Spere al jere un perfezionist de lenghe, cun soluzions ortografichis e neologisims che a voltis a àn fat ancje dibati, ma che dutcâs a vevin il fin primari di slargjâ l’ûs dal furlan a ducj i cjamps di ativitât: dal scuelastic al burocratic, dal sientific al zornalistic. Ancje par chest s’impegnà cetant tes traduzions. Oltri a poesiis e contis al à voltât par furlan oparis di Neruda, Prévert, Hemingway, Hilkmet, Jiménez, Andri Peer e un test teatrâl di Tennessee Williams. Impuartant simpri sun chest cont il so contribût a la realizazion dal progêt “Centri Friûl Lenghe 2000”, ch’al puartarà a la redazion “Grant Dizionari Bilenguâl Talian-Furlan”, par cumò disponibil in vieste di CD. Di memoreâ ancje che tal 1975 al à colavorât a l’impuartante ricercje dal grop di studi Alpina di Bellinzona (CH) su la consistence numeriche dai “Cuatri grops nazionâi (ladin-furlan, italian, sloven e todesc) dal Friûl V.J.”

Na foto storica, dl 1985 a Savognin (CH): Agnul Pitane (Union Scritôrs Furlans), Berth (Uniun Scripturs Rumantschs) y Berto Videsott (Uniun Scriturs Ladins Agacins).

Agnul poet e scritôr preseât e innomenât (ancje fûr di chenti), e cundifat dongje di saçs e libris tecnics al à publicât sîs ricoltis di poesiis: “Semantiche dal flaut” (1975), “Un istât” (1979 e 1994), “Chês flamis” (1998), “Lis paveis di Plasencis” (1992), “Impressions, visions” (1997), e “Il timp al à alis” (2001). Tal cjamp de prose, lis contis “Il sît di Diu” (1983), e i saçs “Olmadis inte Europe” (1999). E no podìn infin dismenteâ che i siei viers a àn vût traduzions par ladin-rumantsch, ladin-dolomitan, italian, todesc, francês, anglês, catalan e castilian. Infin o scugnìn vê iniment ancje lis colavorazions zornalistichis cui sfueis: “Int Furlane”, “La Patrie dal Friûl”, “La Vite catoliche”, “Int”, “Alto Adige” (pe pagjine ladine) e naturalmentri “Gnovis Pagjinis Furlanis”. Al è presint in dutis lis antologiis de leteradure furlane.
L’ami Agnul, ch’al à spindude la sô esistence pal Friûl, pal ricognossiment dai siei dirits e par fâ incressi la sô marilenghe, al restarà par simpri tai nestris ricuarts. A Joane e a chei di famee il coròt plui sclet e sintût de direzion e de redazion dal sfuei “Ladins dal Friûl”. Renzo Balzan (agacìn)