Ai artisc' n jop de euro, d'autri va fora a vuet
L plan 2005 é gnù aprové, endut 831.662,00 euro - La pert da louf ai artisc' 419.662 euro - 300.000 euro per guant da zacan y d'auter - Demé 52.000 euro per la stampa ladina - Al nasc does manifestazions ofiziales, cultura dal aut: Di dla cultura Ladina y Forum cultural
Nia dadie à la Jonta de Bulsan aprové l plan anual 2005 per l sostegn a la cultura dl grup linguistich ladin. Te chest tómel ite i contribuc per manifestazions, per la promozion linguistica, per la colaborazion con i Grijons, desche ence contribuc ai artisc', a les lies, ai media y i contribuc per investizions.
Zaolá é "la pluevia" di contribuc publics plu sterscia, co pa?
Pro les manifestazion che é sun l program anual 2005 per l sostegn a la cultura él da nominé l “Dé dla cultura ladina”. “Tl zenter de chesta manifestazion, a chela che al pò tò pert dutes les persones interessedes, él tematiches che reverda l grup cultural ladin” , dij l assessorat. Plu o manco unfat é ence l Forum cultural ladin che vegn metù a jì en colaborazion con la Consulta culturala ladina dla Provinzia, l Ofize cultura ladina y chi che se dà da fé per la cultura ladina. Per chestes scomenciadives végnel vedù dantfora contribuc che amonta a 20.000 euro. “Foradechel volonse en chest ann colaboré deplù con i Rumanc dl Cianton di Grijons per renforzé, tres projec desvalifs, les raijes linguistiches y culturales che i on deberieda”, dij l assessour Mussner. Per investizions dles unions culturales ladines per compré per ejempl guant da zacan, media o strumenc végnel metù a desposizion tl 2005 endut 300.000 euro. La soma de 40.000 euro vegn preveduda per ativités de formazion generales dles unions o per ativités singules, per ejempl la publicazion de libri. La stampa ladina vegn sostegnuda entratant l 2005 con endut 52.000 euro y per l sostegn artistich él gnù metù a desposizion 419.662 euro (osp)
