benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Diozeja de Bulsan-Persenon: degun interes per tegní unis i Ladins
scrit ai 29 January 2005 da les 22:47:03 da noeles

Politica

 

Dl 1964 á la diozeja da Persenon daidé despartí i ladins 

De otober dl 2004 él vegnú festejé i 40 agn dla diozeja nueva de Persenon-Bulsan, degun reladour n'á toché la plaia de despartizion che chesta á gaujé per i Ladins - L soul interes dles autorités de gliejia enlaouta: abiné i todesc te una na diozeja - Tl Friul se astila les autorités de Gliejia autramenter

Valch Gliejia tol posizion ence sun la metuda adum de n statut regional. Al é l cajo de chela furlana de Udin che dij la sia sun l sboz dl statut regional nuef. Na minonga clera dita fora dal vicar general Giulio Gherbezza entratant na manifestazion contra l statut nuef. Chilò da nos él gnù recordé i 40 agn dla diozeja Persenon-Bulsan zenza podei audì na parola sun la ferida fata a la mendranza ladina dles Dolomites l ann 1964. Enlaouta fova ciamò Ampez y Fodom pro la diozeja da Persenon, n gran aiut per l'unité.

L vedl vescul dla diozeja de Persenon-Bulsan, Josef Gargitter. Per uní i todesc tla medema diozeja de Bulsan-Persenon - bona pert audiva pro la diozeja de Trent desche ence Gherdeina y Fascia - án anter l auter dé su les plovanies de Ampez y de Fodom metudes permez a la diozeja de Belun, contra sia volenté. Liams secolars tl ciamp dla gliejia y di prevesc anter Val Badia, Fodom y Ampez é enscí jus a fin. 




Ence la Gliejia de Udin dij che na concordanza anter Friul y Triest mess vegnì arjonta y ala à tout posizion sun l sboz de statut regional con l'intervent dl vicar general dla arzidiozeja, mons. Giulio Gherbezza, che à rejone entratant la manifestazion popolara contra l sboz ai 13 de november. "Sce la Gliejia dij la sia sun la chestion dl statut", à dit l vicar, "spo l fajaràla, ajache ala sa d'ester tres steda <coprotagonistes> dla storia dl Friul". Te sie descurs s'à l vicar nia demé acontenté de renforzé l apel a reconesce les raijes de Aquilèe che à daidé pro a determiné la storia, la cultura, la religion, l teritore, les istituzions y i lingac dla region y che giustificheia "une specificitât ministrative, orientant il compit internazionâl di chescj teritoris te gnove Ourope", ma al à ence sotlinié na seconda chestion che dess gnì afronteda dal statut nuef: l raport anter l Friul storich y Triest. "Al é un intop ch'al à pesât palesementri tai prins 40 agns di storie di cheste Regjon". La Gliejia de Udin é dla minonga che per tò demez l antagonism desdrutif anter l Friul storich y Triest y ruvé a na complementarieté de profit, messonse reconesce les does spezifizités y garantì a trames does la poscibelté de realisé sies potenzialités "cence primogjenituris e prevaricazions". L vicar Gherbezza à recordé che la Gliejia furlana de Udin à sostegnù la creazion de na region autonoma y canche al é nasciù la region "Friuli-Venezia Giulia" con n gran dejecuiliber a vantaje de Triest s'ála tresfora batù per la medema dignité dles does componentes. Te chest vers à l vicar ence recordé la "Mozion" dl clerus furlan di agn Sessanta. Anter l auter àl ence toché la vera per la Université dl Friul, l impegn per la renascuda materiala y spirituala do l tremoroz, per l reconesciment dl lingaz furlan, sloven y todesch y per l svilup dla mont. Per cie che reverda la "Samblee des Provinciis dal Friûl" à l vicar avertì che "l'idee di riunificazion dal Friûl storic e sta sù dome contun stîl policentric, cence prevaricazions e s'e nas une comunitât eculibrade fra lis provinciis di Perdenon, di Gurize e di Udin". L vicar à spo sclut ju dijan che l Friul à l dert de avei sie post, sie reconesciment tl statut regional nuef. I furlans dess s'impegné per chest obietif. Sciche an veid se trátel de na ousc sterscia che se fej audì ence entratant na manifestazion politica.

Chilò da nos él gnù festejé y recordé tratant l meis de otober passé l dé 8 de aost dl 1964 canche al fova nasciù la diozeja de Persenon-Bulsan. De gragn descursc y gran contenteza per l aveniment y n gran laut per l vescul Gargitter, souradut per sia diplomazia y ressoluteza (Hans Heiss). Zenz'auter n gran suzes per la popolazion todescia de Südtirol, ma na gran ferida per la mendranza ladina y che degun reladour n'á toché. Enlaouta fova ciamò Ampez y Fodom pro la diozeja da Persenon, n gran aiut per l'unité.

 Al é tomé enscì ence l soul fil de unité interladina. A nia à joé la reazion di ladins da Souramont, souradut di ampezans y de na pert dl clerus che fova vegnù consolé con la empromiscion de podei endò gnì zeruch tla diozeja nueva. Tl meis de aost dl 1964 é ruvé l vescul Gargitter ite a Fodom a rejoné con l clerus da Souramont envian i prevesc a stimé al Papa, a laoré inant con pazienza, ajache chesta fova na dezijion touta dal aut. Al ne ti à nia dit che al fova frut de sia "diplomazia y ressoluteza". Degun di prevesc reladours à toché la chestion. Ence chesta "diplomazia"? (uc)


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Diozeja de Bulsan-Persenon: degun interes per tegní i ladins unis (ponc: 1)
da travers ai 30 January 2005 da les 00:26:27
(Infos sun l utilisadour | Ti mané n messaje privat)
La unificazion di confins provinziai con chi dles diozejes fajova pert, sce i ne me fale, dl concordat anter la Talia y l Vatican. Chest valova en prinzip per duta la Talia ma al ne é nia vegnù implementé dlonch; ciamò aldidancuei él tel piceres diozejes, dantaldut tl sud, che ne toma nia adum con les provinzies.
Sudtirol é na provinzia a statut spezial ence de chest vers: la sacra diplomazia y la democrazia cristiana y popolara ne à fat deguna fadia a mete en pratica cie che l Vatican ti ova enlaouta empermetù al "Om dla providenza". Vigni bon cristian sa che degugn pò se mete contra la "providenza" cis se chesta é sostegnuda dai entresc temporai dla gliejia y dai "bujegns" dla politica. Cie che pensa la jent é dldut secondar te chest model de democrazia.



Re: Diozeja de Bulsan-Persenon: degun interes per tegní unis i Ladins (ponc: 1)
da Jandaniel ai 30 January 2005 da les 09:54:55
(Infos sun l utilisadour | Ti mané n messaje privat)
No, al ne é nia per gauja dl Concordat tant che ie sé, l concordat fova bele vegnú firmé dl 1923.
Fat él che n grum de diozejes dla Talia ne se cuer nia con i confins provinziai y an ne á nia bria da ji tl sud, al basta jí tla provinzia de Belun. L comun de Sappada/Plodn, sceben aministrativamenter pert dla provinzia de Belun, auda per cie che reverda la diozeja a chela de UDIN. Chest nes desmostra che con n pue de "ressoluteza" éssen a poura nia podú tegní ence i ladins unis, ma ala diozeja de Persenon ti envalóvel demé de avei l "Deutscher Anteil" dla diozeja de Trent. Na cossa da se daudé enfin a encuei ....



Cherta Ladinia brixino/tiroleisa (ponc: 1)
da Jepele ai 30 January 2005 da les 10:23:33
(Infos sun l utilisadour | Ti mané n messaje privat)
Spo en él pa ciamó de chi che met sun l sfuei cultural di Ladins dles Dolomites na cherta "Ladinia brixino-tiroleisa", che pó zenzauter y dessegur jí ben per caraterisé n temp storich te n articul sun la storia, ma no sciche cherta da vijita fissa sun la pruma plata. Enscí desmóstren de volei entorje la storia ....


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.365 seconc