Al é l moment de tegní adum ....
L president dla Lista LADINS, Adi Demetz: "La situazion ne é pa nia tant dramatica coche ala pér"
Na senteda chieta, ma dassen interessanta chela tegnuda da la Lista Ladins en sabeda passeda a Bulsan per rejoné dla situazion di ladins dla provinzia de Bulsan, dl partí nuef nasciù dal moviment dla Lista ladins, da sia organisazion, da sie program y da sie sostegn finanziar. Jent ne fòvel nia truepa ence demé bele per l gran freit, ma dutes persones enjignedes a dé na man, a laoré danuef y a chirì soluzions nueves. Persones cualifichedes à dit la sia con spirit de unité y zenza dé ju persoura i autri. An é piés via da n ejam dla situazion di ladins che viv tl comun da Bulsan y chilò à fat l president dla Consulta per i problems di Ladins a Bulsan, Dariz Dolores, sia relazion mostran su les zifres che reverda la prejenza di ladins tl comun. Ala à samben ence recordé l "status" atual dl andament dla ciasa-alberch che dess ester enjigneda per l 2006.
An à spo toché la chestion dles lites de comun da Bulsan analisan i candidac potenziai. Te chest vers gniràl ciamò fat plu avisa na enrescida anter la popolazion per podei slarié fora y mioré l certl di candidac. An cherdarà ence ite valgunes categories de persones per conesce sia minonga y avei sie consei. An provarà te vigni vers de tò su n contat nuef, de conesce miec les persones ladines che viv a Bulsan.
An à spo ence cialé a les lites ti autri comuns dla provinzia, souradut ti comuns ladins, analisan en particolar en valgunes situazions. Te n clima davert àn ipotisé valgunes soluzions. Da ultim àn cialé n puech plu inant a les lites provinziales. Chilò à rejoné l president nuef de Lista ladins, Heinrich Demetz, dijan che la cossa ne n'é pa nia tant dramatica coche ala pér y che al é sauté fora valgugn elemenc nuefs che dà na bona speranza. Carlo Willeit da ultim à toché la organisazion dl partí nuef, souradut l bujegn dl tesserament y l problem dl finanziament. Al é l moment de tegnì adum. (uc)
