La Generela se muev a livel politich

Ala se damana che les autorités plu autes dles trei provinzies definesce finalmenter programs y provedimenc aldò dla lege 482/99 

En lunesc dl'edema passeda, ai 24 de jené '05, s'á na delegazion dla Union Generela di Ladins dles Dolomites urté con l president dla Jonta dla provinzia de Belun, Sergio Reolon y con l'assessoura a les mendranzes tla provinzia, Daniele Larese Filon. Chesta urteda é la terza che la Union á abú con les autorités plu autes dles trei provinzies, do Trent y Bulsan. Argoment prinzipal dla enconteda fova l'aplicazion dla lege cheder nazionala, la nr. 482/99 sun la sconanza dles mendranzes y les poscibeltés che ala veid dantfora, canche chestes é spidicedes sun deplú provinzies y regions desche al é le caje pro i Ladins dles Dolomites.

La delegazion dla Generela da manciancia deberieda con les autorités provinziales beluneises.

L president Sergio Reolon s'à desmostré scialdi ben informé y interessé a les problematiches ladines, reconescian l carater particolar di trei comuns ex-tiroleisc y dantaldut l laour de valuta che la Generela á condut inant tles trei provinzies per lié adum i ladins soura les seides provinziales fora. La Generela meina dassen do che al vegne tost cherdé ite na enconteda dles autorités plu autes dles trei provinzies per definí y rejoné fora finalmenter programs de colaorazion te desvalifs ciamps culturai y scolastics. L Ofize de Presidenza dla Generela se declareia content y se aoda che da la bona colaborazion pòssel defata  madurí fruc te n davegní nia tant dalonc.