benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Ladins dles Dolomites o Ladins de Persenon/Tirol
scrit ai 25 January 2005 da les 20:41:49 da noeles

Storia


Ladins dles Dolomites o Ladins de Persenon-Tirol

Onse pa debujegn de na eticheta nueva? - La revista "LADINIA" dl Istitut Ladin rejona sen te n iade de na "Ladinia brixino-tiroleisa"

Sun l cuertl daite dl ultim numer de Ladinia XXVIII, Sfuei Cultural dl Istitut Ladin Micurà de Rü,  pòn sen vedei, y bonamenter ence tl davegnì, na cherta intitoleda "Ladinia brixino-tiroleisa" y chel sun les prumes plates tant che desche "cherta da vijita". Cie che l comité scientifich dla revista y l Consei dl Istitut vuel dí é cler: dé da entene che l vescovat de Persenon y la contea de Tirol sie zaco stés dezijifs per l nasce dla etnia ladina y sie mantegniment, trames ipoteses che ne pò nia vegní confermedes con n "scì" net y cler. La sensazion é chela che la cherta é gnuda depenta pian via da posizions ideologiches y che an vuel ti dé "n mantel scientifich" a les posizions politiches di todesc. Rie da se imaginé che l redadour dla Ladinia da denant essa lascé ite na tel cherta tla Ladinia, nia per ultim davia che la situazion di confins é scialdi plu complicheda de chela che vegn depenta. 



Per prum: l confin diozejan de Persenon ne pò mai ester sté dal 811 desche al vegn indiché, davia che de diozeja da Persenon rejónen empermò do l ann 1000. Denant fova la senta dl vescul sun Jevun. Empermò anter l 1100 y le 1200 scoméncen de rejoné de Tirol che se deslergia de gré en gré, plan plan en antagonism con l vescovat de Persenon. I confins diozejans é tresfora vegnus mudés:  p.ej. á Fodom audí per n valgugn agn, enscí dal 1818 al 1820 pro la diozeja de Belun. Ence Laste y La Rocia, fora dla "Ladinia" amarsceda a cuecen sun la cherta, á audí per n cert temp pro la diozeja de Persenon. Gherdeina (enfin al 1964) y Fascia á audí dal 1818 inant pro la diozeja de Trent, ma chest confin mancia sun la cherta dla Ladinia "brixino-tiroleisa".  Moena é daldut n caje particolar y Ampez tamben.Tirol y la diozeja de Persenon ne fova nience dagnora entités che se cuer una con l'autra, ma gonot antagonistes. Y an ne veid dantaldut nia cie che al fova dant l vescovat de Persenon y Tirol, cie é veramenter dezisif per i ladins, da oláche al peia via la genesa de sie lingaz y de sia cultura. La Ladinia fajova pert de trei provinzies romanes, dla Rezia Secunda (Gherdeina, Funés, Lijon) y dl Noricum (pert dla Val Badia, Ampez y e.i.) y Venetia et Histria, ma i confins avisa ne é dutaorela nia claris. I confins a sud ne fova nia vegnus destenus o mantegnus per tó ite "na Ladinia" ipotetica, ma fova enscí per rejons strategiches, ti curí les sciables a les does gran valedes, chela dl Isarch y chela de Puster.

Dal cianton politich á i ladins tl vedl Tirol dagnora abú puecia y deguna parola. La germanisazion - tl raion dl Tirol - á scomencé adora: dl 600 él vegnú a gran ones i baiuvars adalerch y á metú man a d'assorbí de gré en gré l a jent de lingaz roman-ladin dl post. Te Südtirol á l element todesch abú la souraventa entourn le 1200, plu o manco 2/3 dla provinzia de Bulsan fova oramai de lingaz todesch y da chest temp inant á i todesc determiné l destin dl Tirol, ence tles valedes ladines. Raions romagnus plu die ladins é la pert orografica a manciancia dl Isarch: Lijon, Eores, Funés, Laion, Ciastel, Neva Ladina, enfin entourn l 14eisem secul y ence plue die con na fasa longia de bilingualism y dantaldut tla Val Venuost oláche l lingaz ladin se á destodé via tl 17eisem secul. Les vedles signories vegniva scialdi comanedes da nobilté importeda de lingaz todesch y desche lingaz ofizial adorova les signories - con l'ezezion de Ampez y de Moena che adorova l talian - l todesch. Samben ne se tolova les autorités nia la bria de lascé i inoms dles valedes y di luesc desche ai fova, mo i todeschisova, al fova plu pratich. L ladin ne vegniva a chi temps nience vedú desche n lingaz da podei adoré a la pér y al ne é nience mai vegnú fat nia per i lascé ruvé adum te na strutura aministrativa, cie che fossa sté poscibel, ma an i á tegnú despartis te desvalifs raions aministratifs - en pert ence contra sia volenté declareda (dl 1848 y dl 1867): Fascia pro l zircondar de Trent, Gherdeina pro chel da Bulsan y la Val Badia pro chel da Bornech. Demé Fodom y Ampez formova - per sia posizion al our - na picera unité.

Nience tl temp che i ladins essa podù ghiré parité de derc sun na basa giuridica desche la costituzion nueva dl 1867 dl Imper Austro-Ungarich ne se l'á i ladins nia fata avalei o miec ne á nia abú na ousc sterscia assé tla politica, davia che ai vegniva raprejentés politicamenter dai todesc y sceben che al fova nasciú en chi agn n cert moviment ladin y che defata dedò fòvel vegnú metú su les prumes unions ladines (dl 1905 a Dispruch).

Te duta la storia dl Tirol storich ne é i ladins mai vegnus reconescius ofizialmenter desche etnia. La colpa ti vegn deda al dejinteres di ladins enstesc che fova enlaouta dantaldut na sozieté paurila con dutes sies limitazions, ma dessegur ne vegnível nience degun impuls da sourajù, l contrar. An conesc documenc datés entourn le 1870 y giatés a Bornech oláche al vegn rejoné dl interes dl stat de todeschisé les valedes ladines al confin talian. Ence la gliejia zercova demeztroi de sburlé ite dlonch l todesch, con gran dejaprovazion di prevesc ladins. Protestes contra les autorités de gliejia dla diozeja de Persenon é conesciudes tl 17eisem secul, oláche i Gherdeines se baudiova (a desvalivanza da encuei!) y manaciova enfinamai l vescul de Persenon de jí dal arzivescul de Salzburg, sie sourastant gerarchich, ghiran con  forza prevesc che savessa da perdiché te sie lingaz, l ladin.

Sibe pro les cumpeides dla jent dl 1880, dl 1890 che dl 1900 ne é i ladins nia vegnus arcumpedés desche tai, ma desche talians. Empermò dl 1910 - sot la prescion di iredentisc' talians che  reclamova con insistenza l teritore a sud dl Brenner per l stat talian - s'en án anadé che al convegniva tegní i ladins despartis dai talians y i ladins é vegnus arcumpedés desche "ladins", ma tres ciamò sot la colona "talians" per ti jí adencontra ai raprejentanc politics dl Trentin che fajova enlaouta ence pert dl Tirol y che fova decontra a reconesce ofizialmenter i ladins.  La situazion deventova tl 19eisem secul tres plu ria: sie destin vegniva vedú tla todeschisazion o tla talianisazion arateda inevitabla. Dant la fin dl secul, dal 1850 inant, él vegnú fat deplú tentatifs da pert dles autorités tiroleises de todeschisé les scoles ladines y de tó ju les ores de talian, cie che á enconté na gran oposizion, dantaldut di prevesc. Chest fat é ju ite tla storia desche l "Enneberger Schulstreit". Talian fova da vedlamenter lingaz de gliejia, de ensegnament dl catechism tles valedes ladines, dlongia l latin samben, perdiché vegnível per ladin.

La relazion di ladins con Tirol é na relazion de subalternité, de "nia-esistenza", de assimilisazion. Ence al intern de Tirol fova i raions ladins spidicés per cie che reverda i certli litai y ne ciafiova perchel nia da mané si raprejentanc tl parlament. Tant plu demarevueia él che an depenj sen na "Ladinia brixino-tiroleisa" desche entité che ne é perauter mai esistida, desche cuna dla "ladinité". Al basta dessegur definí l raion desche Ladinia dles Dolomites / dl Sela, coche an l'á dagnora clameda y cialé devers l davegní y nia devers n passé che an mess dutaorela ciamò enrescí.

Ma an mess dé pro, al é bonamenter ence valch cossa che à contribuì al mantegniment dl ladin te si ultims teritores de retrata: l ester liés aministrativamenter devers nord empede devers sud che á fat da sief linguistica devers l talian, l isolament  y la posizion alauta dles valedes ladines che ne ti fajova enlaouta a degugn la gola economicamenter. Chestes é bonamenter les rejons plu dezisives. N interes da pert dles autorités tiroleises per n mantegniment atif ne él mai sté. L ne ester mai vegnus reconescius desche etnia te Tirol/Imper Austro-Ungarich, ma l ester vegnus aratés talians (per rejons politiches) á dessegur endeblí cotant la posizion di Ladins do l 1918 y do l 1945, podova pu l'Italia se basé sun les cumpeides tiroleises che classificova i ladins desche talians. Tirol ti ova fat enscí n "Bärendienst" ai ladins desche an dij tl todesch. Tla retrospetiva pò tamben l passé dl 1918 dla Ladinia a l'Italia avei abù n efet a ben dl mantegniment dl lingaz ladin; dantaldut te Gherdeina fòven sun l troi de passé definitivamenter al todesch, n prozés che é vegnù arferé ju, ma nia daldut.  (e.c.)

 

 

 Referendum a souramont per gní permez a la provinzia de Bulsan
 Ladins dles Dolomites o Ladins de Persenon/Tirol
 Ladinia brixino-tiroleisa: n valgugn sclarimenc
 La Rocia: Ladinia brixino-tiroleisa
 

 


 
Liams emparentés
· Deplú sun l tema Storia
· Chier te noeles


L articul plu liet te chest tema Storia:
Relazion dl dr. Mischi Georg en ocajion di 100 Union Ladin


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Ladinia dl Sela/dles Dolomites (ponc: 1)
da Jepele ai 12 February 2005 da les 16:39:34
(Infos sun l utilisadour | Ti mané n messaje privat)
Ence ie me é fat marevueia dla cherta ....
Ie creie che per i Ladins él sté cotant fatal ruvé pro la Italia dl 1918, zenza ester vegnus reconescius sot Tirol, ailò vegnívei cumpedés desche talians pro les cumpeides dla populazion. Tant plu ert se án fat de fé avalei dl 1918 pro l tratat de pesc y dl 1945/46 Gruber-De Gasperi, che al esisteia n popul/na comunité ladina, te n temp de gran confrontazion.
Essa i ladins abú bele sot Tirol valch reconesciment, fóssel sté plu saurí se mete en juech .....



Re: Ladinia dl Sela y Ladinia veduda da la Svp (ponc: 1)
da giatfosch ai 06 February 2005 da les 18:39:12
(Infos sun l utilisadour | Ti mané n messaje privat)
döt l monn dla linguistica baia di ladins dles Dolomites, o dl ladin "selan"; segn vegn chesc Istitut - chel medemo che à arozé l ladin standard - con i ladins brixinesc-tirolesc. Ala fin n'án bria da injunté nia. na terminologia falsificanta se comenteia da se.



Re: Ladinia dl Sela y Ladinia veduda da la Svp (ponc: 1)
da EValentini ai 26 January 2005 da les 21:33:32
(Infos sun l utilisadour | Ti mané n messaje privat)
La cossa plu enteressanta dla cherta é, polester, che ala vegn prejenteda per ladin standard: l titul y la liejenda (dert fòssel lijenda). L ladin standard é pensé avisa per chest: sciche lingaz unitar y comun de duta la Ladinia. Ie spere che al ne se trate nia demé de n "hapax" ma de na lita clera da pert dl diretour y dl comité scientifich de "Ladinia".


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.379 seconc