Curs da emparé ladin pian via dal talian
N’autra bela publicazion dl Istitut Ladin „Micurà de Rü“ dantman.
L ladin desche lingaz de mendranza y per sies particolarités à da dagnora encà descedé la curiosité dla jent foradecà. Ciamò encuei él tres deplù persones che desmostra interes per l lingaz y à enchinamai vueia da l emparé. Bele da n pez encà végnel tegnì cursc de ladin per nia ladins che vegn frecuentés y apriejés da bendebot trueps. Al vegn ence tres damané do vocabolars o libri per conesce miec l lingaz. Baudi fòvel die alalongia puech material dantman per emparé l ladin.
Sen àn finalmenter n strument de laour de emportanza che cuer chesta locia. Al é l "Cufer de ladin" metù adum da Daria Valentin y dé fora dal Istitut Ladin Micurà de Rü - n curs de ladin dla Val Badia per talians te unesc lezions. L Istitut Ladin à bele dé fora l Curs de gherdeina per todesch y talian metù adum da Rut Bernardi. Les unesc lezions de ladin dla Val Badia é n adatament dl material per gherdeina al contest y idiom dla Val Badia.
L cufer de ladin nuef contegn n manual, n sfuei de eserzizes, n glossar y doi CDs. Les unesc lezions dl manual é partides ite te sies capitui. Dantfora él n juech - n diagram per emparé paroles nueves -, spo végnel dant n capitul sun la pronunzia, na letura, en valgunes frases idiomatiches, curiosités y a la fin les regoles de gramatica. Les informazions dedes dant tl liber pò gnì adoredes ti eserzizes che é da giaté tl sfuei di eserzizes. L sfuei raprejenteia la pert plu pratica y creativa dl curs, y é struturé plu o manco sciche l liber con dantcà na reflescion sun les paroles, spo él eserzizes de comprenjion dl test, de gramatica y per scrive dialogs y de pices conties. L’ultima pert dl sfuei prejenteia la soluzion di eserzizes. Les za. 7000 paroles che vegn dant tl liber y tl sfuei é da giaté tl glossar. L glossar pò raprejenté una dles fondamentes dl vocabolar talian – ladin che vegn laoré fora al moment tl Istitut Ladin. Na novité dl glossar é che ala va da giaté la parola taliana pian via dal ladin.
I doi CDs che completeia la publicazion permet de audì la pronunzia dles paroles. La mujiga sun l CD é gnuda scrita y soneda aposta da Alessandro Trebo. Ence i dessegns che abelesc la publicazion é gnus fac aposta da Gabi Mutschlechner.
L "cufer de ladin" é na publicazion che se prejenteia plajoul te sie aspet grafich y samben ence tl contegnù. A Daria Valentin ti él garaté de mete adum te puech temp n’opera completa che spliga les strutures de nost lingaz y é perchel d’utl ence per la jent dl post. Emplù éla juda ite tla storia y tla cultura dl post mostran su sot a forma de dialogh deplù argomenc. L curs ladin gnirà fora ence tla verscion todescia. (uf)
