La scomenciadiva „Kulturpass“ va inant ence tl 2005
49 organisazions culturales te dut Südtirol lascia do l 50% sun l priesc dles chertes d’entreda
Les repartizions a la cultura dla Provinzia lascia al savei che la scomenciadiva „Kulturpass“ va inant ence tl ann 2005. En chest iade ne méssel nia plu gnì fat na domanda aposta per giaté l „Kulturpass“ nuef. Chest ti gnirà mené tl meis de merz 2005 a vigni union che à l dert de l avei. Al vel dal 1 d’auril 2005 inant, per doi agn alalongia. L „Kulturpass“ atual vel ciamò enfin ai 31 de merz 2005.
L “Kulturpass“ giata cheles unions con n’ativité prinzipala tl ciamp dla cultura. N auter critere che dà l dert al “Kulturpass” é che l’ativité mess gnì fata da colaboradoures y colaboradours per l plu volontariamenter. Emplù mess la union ademplì la condizion de gnì sostegnuda dai Ofizes a la cultura todescia, ladina y taliana, dal Ofize laour per y con la joneza, dal Ofize formazion y dal Ofize biblioteches. L „Kulturpass“ pò gnì dé inant y adoré da dutes les colaboradoures y da duc i colaboradours che fej pert dla union. Mostran su l „Kulturpass“ lascia 49 organisazions culturales te dut Südtirol l 50% do sun la cherta d’entreda a manifestazions desvalives. Tl ann 2003 à la Repartizion Todescia partì fora 7.375 „Kulturpässe“ a dutes les unions, ence a cheles ladines. Informazions plu avisa pòn giaté pro la Repartizion Cultura Todescia y Familia al numer de telefon 0471 41 33 11 o pro l Ofize cultura y scola ladina al numer de telefon 0471 41 70 20. Les informazions é ence sun la plata internet www.provinzia.bz.it/kulturabteilung/kulturpass o www.provinzia.bz.it/cultura-ladina/kulturpass . (osp)
