Iscrizions a les scoles enfin a la fin de jené
Pedagogia di mutons: referac te Gherdeina y tla Val Badia - Sostegn a la cultura: domandes anter i 31 de jené 2005
I termins per se scrive ite a les scoles é vedus dantfora da does deliberazions dla Jonta provinziala y plu avisa da la deliberazion nr. 5161 di 29 de dezember 2000 y da la deliberazion nr. 3634 di 13 d’otober 2003. Te chest’ultima él prevedù les iscrizions a les scoles elementares: per i mutons y les mutans che peia via a scola y che complesc i sies agn enchin ai 31 d’agost 2005 é l termin d'iscrizion ai 31 de jené 2005. Al pò ence vegnì scrit ite i mutons y les mutans che complesc i sies agn anter i 30 d’auril dl prum ann de scola. Per les scoles mesanes é l termin ai 28 de fauré 2005 y per les scoles autes ai 31 de merz 2005.
Pedagogia per l’infanzia: referat te Gherdeina y tla Val Badia
Tles encontedes con l professour Fthenakis te Gherdeina y tla Val Badia vegniràl sclarì les desfides nueves per genitours, educadoures y educadours dla scolina. La pedagogia di mutons se conzentreia sun mutons y mutans sot ai sies agn, sun si genitours y sun d’autres istituzions che se dà ju con de pici mutons sciche per ejempl la scolina. Ai 13 de jené 2005 da les 20.00 podaràn ascuté su l professour Fthenakis tl Istitut ladin “Micurà de Rü” a San Martin de Tor y ai 20 de jené 2005 da les 20.00 tl salf comunal de S. Crestina. Chisc referac vegn metus a jì da la direzion dla scolina “Ladinia” y vegn tegnis per todesch. Dutes les persones interessedes pò tò pert.
Sostegn a la cultura: domandes anter i 31 de jené 2005
Enc, unions y persones singules che à n'ativité tl ciamp dla cultura pò damané do n contribut per ativités y investizions culturales. Al é ence prevedù contribuc per la formazion en general (p.ej. contribuc per les speises de stampa). Ence artistes y artisć aciasés te Südtirol pò fé domanda de contribut. Al vegn sostegnù publicazions, mostres y i. i., desche ence la formazion y l perfezionament dles artistes y di artisć joegn sot ai 30 agn.
Les domandes é da dé ju anter i 31 de jené 2005. I formulars dles domandes é da biné tla rei zivica de Südtirol a la miscion: www.provinzia.bz.it/cultura-ladina o tl Ofize cultura y scola ladina, Bindergasse 29, Bulsan, Tel. 0471 417020/10. (osp)
