benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Al bastassa puech per se entene miec: rejoné deplù deberieda
scrit ai 08 January 2005 da les 10:17:08 da noeles

Politica


Strameses de peton anter les vals ladines

La despartizion fascista à trat souces dret sotes anter i ladins: la politica dla Svp ladina fej desche an messessa se paré contra i ladins da souramont

Dutalann végnel baudié che i ladins é sun l ciamp politich truep massa puech atifs, cis can che ala se trata da defene sie grup etnich. Al é ben veir, vigni valeda ciala demé a sia meisa amez stua y ne s'anadà nia che al mancia tla medema stua les autres meises, vigni valeda ciala demé a sie taier. An ascouta su plu gen l gran vejin empede sie pice vejin, davia che chel  empermet da vegní plu pascius. La desfidenza defront al auter é grana, é segn de egoism y de puecia creta tla bona volonté dal vejin ladin. An fej desche an messessa se paré contra i autri ladins deplú che contra i gran vejins che manacia da for la sostanza, la identité ladina, l souravive dla comunité ladina. Ence lies culturales mostra massa puecia vueia da laoré adum, da jì per les medemes semenes y da passé via l piagn enfin tla autra val. Al é ben empaca veir: la despartida fascista à trat na gran souc anter les vals ladines y i ladins scouta chiec; nosta jent azeta chest amez sie os dal spinel fora, ala se desmostra desche na stramesa de peton.



Lascion da fé pude, al ne porta nia, mo l dì fora pòn ben, segn che al é veir cie che an scriv. Ma co déssela pa ji inant? Al vegn dit che les aministrazions ne mostra nia gran enteres per na politica ladina. Va ben, al pò ester veir, ma spo él da armueve valch deplù. Chi che à idees per na politica ladina é damanés da vegnì empera, da les fé publiches. Al é da sensibilisé cheles persones che é cherdedes a porté inant sun ciamp politich ghiranzes politiches ladines. Chestes é i ombolc, i assessours comunai a la cultura, i raprejentanc di partis politics. Chilò mess i ativisc' se dé da fé. Ai dess jì a rejoné con raprejentanc de comun, dla politica, dla cultura - un n iade, doi iadesc, dret gonot, enfin a che la glacia é delegheda. Demé sciuré fora sun meisa o te valch foliet les propostes é massa puech, davia che ales ruva te bagai. Miour él da se senté adum per se capì miour, da rejoné de nost mond ladin, de cie che i ladins messessa giaté garantì da la man publica. Demé con emparé da se conesce miour anter ativisc' ladins y aministrazions publiches podessa l molin giaté ega y mete man da majené ju la blava che é bele agn te antermeia enfin che la ciamena dla farina fossa plena de farina bela clonza, fina y blancia. Manco sçiampì y plu gonot se urté per rejoné! La mancianza de contat anter lies culturales y les aministrazions é gonot gauja de melentenudes y de desfidenza y dessegur ence na gauja che nia ne va inant. Les unions mess fé l prum vare: jì daite da porta de comun enfin a te stua dal ombolt, dal assessour. Na enconteda deberieda anter raprejentanc de comun y unions pò dessegur porté a d'arjonje cotant deplù a ben dla comunité ladina.

 Lois Trebo


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Al bastassa puech per se entene miec: rejoné deplù deberieda (ponc: 1)
da travers ai 08 January 2005 da les 16:23:37
(Infos sun l utilisadour | Ti mané n messaje privat)
Les strameses anter i ladins ne é nia demé de peton mo ales é ence, sciche à dit n iade n ex intendent ladin, chersciudes ite te nosc cefs y te nosc cuers. Ma ti dé la gauja dla despartizion anter i ladins al fascism é n puech massa comot! Propi chi che ne lascia fora deguna ocajion per se baudié dla despartizion dl Tirol (miné él samben chel todesch), é i prums a defene con piesc y con mans i confins che ai à arpé dal fascism, in primis la SVP "ladina".
L fascism é mort da n pez y l stat talian à aprové nia da giut na lege, la 482/99, che deida renforzé la coejion y l svilup dles mendranzes linguistiches despartidedes sun l teritore de deplù provinzies y regions. Les autres mendranzes en à atira profité, chi da Bulsan indere se cruzia dantaldut de coche ai podessa pié do i scioldi da Roma zenza messei renunzié a sies competenzes garantides dal Statut. Y chest "in barba" - dijessa i talians - ai enteresc dla comunité ladina, che vir, sciche an sé, nia demé daite dai confins de Südtirol.
Te Südtirol vegn vigni scomenciadiva interaladina fereda ju con la vertola di confins provinziai, chi volus da Mussolini. Al ne é nia veir, dijiarà zachei, Durnwalder entes se à tout dant de cherdé ite na conferenza di ombolc ladins per traté di problems che ti stà a cuer a dut l raion ladin (mìnel mo la Ladinia?). Ben, al é bele n pez, bele dant les lites regionales, che an auda de chesta famousa conferenza, an à ence podù lieje intervistes di ombolc sun chest argoment - olà che chi de Gherdeina y Badia à sotrissé dantaldut i enteresc particolars de sia provinzia, plu che chi di ladins en general - ma i aspeton ciamò tres de vedei l miracul, l miracul de n event politich panladin magari per grazia de Durnwalder.
Rejoné con i aministradours, i oms (y femenes?) dla politica é bon y dret, avisa cie che à dagnora fat la Union Generela. Damanede mo a Ilda Pizzinini tant de iadesc che ala é juda a Bulsan, a Trent, a Belun, a Roma per enconté oms dla politica - de vigni colour!- y tant de iadesc che ala à envié chi berbesc ence te sia ciasa per ti porté dant, ti splighé les ghiranzes de nosta jent. Con cie resultat pa? I ombolc de Badia y Gherdeina, l assessour provinzial a la cultura ladina y l gran patron da Bulsan à fat a gara per lascé alsavei che la Generela podarà eventualmenter ti fé la fancela. L louf muda l polan mo nia l vize!
De prums varesc en à fat la Generela n grum, ala é juda daite da porta di comuns n grum de outes. Al fossa ora che ence i raprejentanc "lités" se degnassa da jì a rejoné con les unions, metan man con la Union Generela di Ladins. Èl damané de massa te n stat democratich?


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.395 seconc