Na fotografia fej la roda dl mond
Na gigantografia dl Aiut Alpin Dolomites pro la maioura fiera dla fotografia dl mond: la Photokina a Köln, ma ence tla Corea y a Madrid.
L'Aiut Alpin Dolomites à abù sia prejenza chest ann a la fiera dla fotografia plu importanta dl mond: La Photokina a Köln dai 28 de setember ai 3 de otober, fiera che vegn fata vigni doi agn y che veid l'atenzion de n grumon de interessés anter amatours y professionisc' fotografics. La firma Durst da Persenon à metù fora a la Photokina na gigantografia dl Aiut Alpin Dolomites. La stampa da les mesures de 1 m x 1,4 m é vegnuda fata sun viere plexi con inkjet, na tecnologia svilupeda da la Durst.
An pò stampé fotografies ence diretamenter sun banda, sun legn (usc p.e.), sun viere, sun mermul, plastica, draps y enscì inant. Laprò é la fotografia ence vegnuda stampeda fora (te na mendra mesura) sun papier fotografich tradizional.
La basa dla gran fotografia dl Aiut Alpin - fata entratant n'eserzitazion de jugn sun la "locomotiva" dl Sela - é steda na diapositiva de Mateo Taibon tl format 4,5 x 6 cm, l "format mesan". Davia che l fotogram é 3 iadesc plü gran dl format normal (24 mm x 36 mm) vála da fé de maiours engrandimenc. Pro fotografies stampedes fora te n format mender veiden ence true deplù i detais. La basa per l gran poster dl joler é steda na scansion da plu de 400 MB, che corespon, per fé l confront con la fotografia digitala, a na fotografia de 90 Megapixel!
L reson a la fotografia é sté dret bon, desche n responsabl dla Durst conta. Enscí à la Durst Phototechnik, spezialiseda sun aparatures per la stampa de fotografies de gran format, tout la fotografia ence per fieres tla Corea dl Sud y a Madrid. Enscí fej la fotografia dl Aiut Alpin Dolomites la roda encer l mond.
Da la Durst giata vigni stazion dl Aiut Alpin Dolomites desche reconesciment n gran poster.
Irsara Siegfried
