Enduneda anter Bulsan, Trent y Cuira - Co la veid pa Bulsan?
scrit ai 17 December 2004 da les 08:45:22 da noeles |
|
Mussner y Chiocchetti deberieda a Müstair
Al dess vegní laoré fora n prum program de laour interladin
 En juebia, ai 9 de dezember 2004, à l assessour ladin Florian Mussner enconté reprejentanc dles istituzions di Grijons dla Svizra a Müstair. Te chesta ocajion à i partezipanc rejoné dla poscibelté de na colaborazion tl ciamp dla cultura. Ence l Vizepresident dl Consei Regional Luigi Chiocchetti, l diretour dl ofize a la cultura dla Provinzia de Trent Marco Viola y l President dla Union Generala di Ladins dles Dolomites Nani Pellegrini, á tout pert a chesta enconteda.
A la delegazion dla Svizra, raprejenteda da Romedi Arquint Cussegl Grond di Grijons, Bernard Cathomas dla „Radio e Television Rumantscha“, Andrea Rassel dla „Lia Rumantscha“, sciche ence Ivo Berther dl ofize ala cultura dl Cianton Grijon, ti àl fat gran plajei, che l assessour ladin Mussner se prova dassen de arjonje na mioura colaborazion con i rumanc dla Svizra. Bele d’autri reprejentanc ladins ova prové de arjonje na tel colaborazion
N grup de laour che vegnirà tost metù su dess sclarí te cie ciamps che al dess vegnì laoré deberieda. La colaborazion dess vegnì ofizialiseda tl cheder de na conferenza che vegnirà bonamenter tegnuda da d'auton dl 2005 a Bulsan. A chesta conferenza tolaràl pert raprejentanc di Grijons, de Südtirol, dla Provinzia de Trent, dla Region Trentino/Südtirol, i media y ence dles organisazions culturales.
L laour di media, dantaldut de radio y televijion, dess ester n pont fondamental dla colaborazion, per podei se conesce miec. Per n’autra outa él sun l program na enconteda de reprejentanc di media ladins y rumanc che vegnirà tegnida tla Val de Fascia. Te chesta ocajion déssel vegnì ejaminé tant inant che i programs rumanc posse vegnì adorés dai Ladins dles Dolomites y samben ence enzescul. Al dess ence gnì ejaminé, sce i Ladins dles Dolomites che fej films essa interes a tò pert pro l festival dl film di Grijons.
L grup de laour metarà adum deberieda n sit interladin per i rumanc di Grijons y i Ladins dles Dolomites. Sun chesta saràl da abiné de vigni sort de informazions sun politica, cultura, scola, economia, turism, trafich, ambient, y enscì inant.
Pro la enconteda àn bel podù mete a jì n projet che à desche fin la partezipazion de n cor dles valedes ladines pro l „Raiffeisen Festival da Chors 2005“, che vegnirà ence mostré tla televijion svizra.
La realisazion concreta di programs de mascima bele fac fora, vegnirà laorés fora plu avisa te na proscima enconteda, che vegnirà tegnida ai 31 de merz 2005 a Gluorn/Glurns. (osp)
| 
