A Rut Bernardi il premi "Walther von der Vogelweide"
Articul souranout dal mensil "Ladins dal Friûl" - edizion de dezember 2004
Grande sodisfazion te Ladine Dolomitane a la gnovitât che a Rut Bernardi j è stât conferît l'innomenât premi "Walther von der Vogelweide". La motivazion che a chest conferiment j à dât la zurie 'e à iniment i risultâts pusitîfs otignûts di Rut Bernardi tal cjamp sientific sul cont dal lengaç ladin, de traduzion di âtris lenghis par ladin-dolomitan e te leteradure ladine, infats e je une preseade poete oltri che impuartat rapresentant da "Lia Scritoures Scurlins".
Nassude tal 1962. Cressude a Urtijëi in Val Gardene, 'e à fat il Ginmasi dal Sci a Stams in Austrie. Podaspò e à fat studis di romanistiche (francês e italian) a Innsbruck. Âtris studis ju à fats a Bordeaux. E je stade interessade a la colaborazion sul progèt lenghistic des feveladis romancis dal Grison alì de universitât di Zürich e inmò a Innsbruck. Podaspò 'e à lavorât al progèt lenghistic SPELL (Siervizi pe planificazion e l'elaborazion dal lengaç ladin), progèt pal svilup di un ladin scrit unificât par dutis cinc lis valadis ladinis dolomitanis.
E je autore di un interessant dialig a sfont lenghistic tra lis personificazions dal rumantsch-grischun e dal ladin-dolomitan. Oltri a chest interès di nature professionâl pal mieç lenghistic tes sôs diviersis implicazions, e je ancje impegnade sul teren des rivendicazions dal dirìt de femine. In dì di vuê e vîf Klausen/Sclûse.
E scrîf sevi in poesie che in prose cun risultâts unevore interessants. Lis sôs poesiis a son dispès dai costruts semantics o dai zûcs di peraulis, a voltis sorants, a voltis acusadôrs, dulà che si esprim chest origjinâl marginalitât, oltri al zà mutivât gust pe scomposizion e la cumbinazion lenghistiche che le svizine par cierts aspiets a la "poesie concrete" de scuele vienês.
A Rut Bernardi j van i compliments ancje de redazion di "Ladins dal Friûl", oltri ai augûrs parcè ch'e puedi cuistâ âtris sodisfazions dal so impegn, simpri cussì cetant passionât.
