Sen onse la poscibelté de ti dé n cheder istituzional a la Ladinia!
Paolo Frena: Ai colegs entourn l Sela damani desponibelté y colaborazion per formalisé te curt temp n organism souraprovinzial y -regional
La data dla convocazion di dejedot ombolc dla Ladinia storica vegn tres plu dlongia y da Souramont mana Paolo Frena, ombolt de Col, ciamò n iade n apel al assessour Mussner y a duc i colegs de creie dassen te chesta oportunité deda da la lege 482/99. Con la speranza che la politica ne ae nia la souraventa. "La convinzion che al toche prové de jì per chesta streda" dij Frena, "vegn dal fat che per massa trueps agn ne á chestes comunités nia abù la poscibelté de se confronté sun chestions de emportanza de nosta storia, cultura y economia. Do la despartizion teritoriala te trei provinzies, él vegnù mancia cheles relazions istituzionales fondamentales per la souravivenza dla cultura ladina.
L'union desche element sterch fondamental, ma souradut union istituzionala, desche prevedù da la lege 482/99, per porté inant nostes istanzes y nosc projec che messarà tò ite nia demé l aspet cultural, ma ence en valgunes chestions de nosta economia che nes sta a cuer a nos Ladins, desche les infrastrutures de coliament, la formazion y l ambient. I dije chest percie che al é vegnù l'ora che la Ladinia storica dl Sela se mete su formalmenter dal pont de veduda istituzional, sen él chesta poscibelté da podei adoré. La Ladinia vegnirá enscí reconesciuda ofizialmenter a livel local, provinzial, nazional y europeich, per garantì nosta souravivenza. Da massa trueps agn oramai sonse despartis su te trei provinzies, con danns da vedei a nosta cultura y a nosta identité. L temp passa y coche i savon, pò ence chest nes conduje a n pont da olà che an ne vegn nia plu zeruch. Sen ne podonse nia plu aspeté. Al assessour Mussner y ai colegs di comuns entourn al Sela damani desponibelté y colaborazion, a na moda che an posse giaté na acordanza y formalisé te curt temp chest organism souraprovinzial. N laour che jirá dessegur a se enjonté a chel che nos fajon dì per dì per nostes comunités, ma che se damana n sforz particolar y i dijesse feter na priorité. Mie obietif é chel de podei ruvé a mete en pé na entenuda de programs per la region ladina dl Sela, lieda a la formazion, a la cultura, al ambient y, setour primar, a la planificazion teritoriala y al turism. Na entenuda trasversala, zenza se desmentié che dal pont de veduda cultural messaràn ti reconesce n post sterch a l'Union Generala di Ladins dles Dolomites, che da trueps agn (100 agn en auter ann n.d.r. ) laora per tegnì viva la coscienza ladina tles valedes ladines. Meton a una spo y conzentron nostes forzes per la gauja ladina, sen che al s'à daurì chesta sfessa con l art. 3 dla lege 482/99 che dij: ...canche les mendranzes é despartides su sun teritores provinziai o regionai desvalifs, pò chestes mete en pé organisms de coordinament y de proposta che i enc locai interessés à la facolté de reconesce!".
